Токтогазиев: мөмө өстүргөн аянтты 50 миң гектарга жеткирүү максатталууда
© Sputnik / Асел Акмат
Жазылуу
Мөмө өсүмдүктөрүн өндүрүүчүлөр ассоциациясынын жетекчиси Тилек Токтогазиев мөмөнүн экспортун 1 миллиард доллардан кантип ашырса болорун айтып берди.
Мөмө өстүргөн аянтты жети жылдын ичинде 50 миң гектарга чейин жеткирүү максатталууда. Бул тууралуу Тилек Токтогазиев Sputnik Кыргызстан радиосуна маек куруп жатып билдирди.
Токтогазиев: мөмө өстүргөн аянтты 50 миң гектарга жеткирүү максатталууда
Анын айтымында, ал үчүн чукул арада жемиш берүүчү кулпунай жана малинага басым жасалат.
"Өлкөдө 4-4,5 миң гектар аянтка мөмө өстүрүлөт. Жети жылдын аралыгында ушул аянтты 50 миң гектарга чейин жеткирүү максатталууда. Европада мөмөнүн түшүмдүүлүгү 30-40 тоннага жетип, наркы үч доллардан жогору турат. Бизде жок дегенде орточо түшүмдүүлүгү 15 тоннаны түзүп, 1,5 доллардан сатсак дагы 1 миллиард 125 миллион доллар болот. Минималдуу эсептер менен алганда ушул көрсөткүчтөр болууда. Ал эми 2030-жылга чейин ага жетүүгө мүмкүнчүлүктөр бар. Учурда 10-20 жылдан кийин дагы суу тартыштыгы жаралбай турган аймактарга мөмө отургузуу каралууда. Көптөгөн өлкөлөрдө түшүм жыйноо убактысы бир айга созулат. Анткени бүт өлкөдө бир убакта бышып жетилет. Ал эми Кыргызстандын өзгөчө климаты түшүм жыйноонун убактысын узартат. Анткени түштүк аймактары жылуу, ал эми тоого жакын аймактар жана тоолуу региондор суугураак. Ошого жараша түшүмдүн бышып жетилген убактысы дагы ар кандай. Демек, кеминде үч айга чейин жаңы бышкан мөмө менен камсыздоого мүмкүндүк бар. Мындан тышкары, топурактын сапаты, мөңгү суусуна байланыштуу жергиликтүү фермерлердин мөмөсү көлөм жагынан кичирээк болушу ыктымал, бирок даамдуу болот", — деди Токтогазиев.
Ошондой эле ал айыл чарбаны каржылоо боюнча программалардын каражатын колдонуп өкмөт менен тыгыз иштешүү зарылдыгын кошумчалады.
