Сары-Челектин жаратылышын сактоо: мал азайтылып, майда дүкөндөр алынат
© Sputnik / Асел Акмат
Жазылуу
Биотүрдүүлүктү сактоо жана өзгөчө корголуучу жаратылыш аймактары департаментинин директору Эмил Ибраев Сары-Челектеги көйгөйдү чечүү планы менен бөлүштү.
Сары-Челек коругундагы айылда малдын санын минимумга түшүрүү макулдашылды. Бул тууралуу Эмил Ибраев Sputnik Кыргызстан радиосуна маек куруп жатып билдирди.
Сары-Челектин жаратылышын сактоо: мал азайтылып, майда дүкөндөр алынат
Анын айтымында, Сары-Челек коругу 1960-жылы уюшулуп, аянты 23 800 гектарды түзөт.
"Сары-Челек коругунун ичинде адамдар жашагандыктан ЮНЕСКО тарабынан "биосфера жана адам" деген статус берилген. Бул анын жерин трансформациялоого жол берилбейт дегенди түшүндүрөт. Бирок коруктун көйгөйүн чечүү зарыл. Ал кандай көйгөй? Коруктун ичиндеги Аркыт айылында 280 түтүн, башкача айтканда 1 500дөй адам жашайт. Алар күнүмдүк тиричилиги үчүн мал багып, чөп жыйнап, жайытты ээлеп, отун, мөмө-жемиш чогултат. Мунун баары коруктун экологиясына терс таасирин тийгизет. Ошондуктан айылдын тургундары менен биргеликте макулдашууга келдик. Натыйжада түтүнгө бир уй, беш жандык кылып, малдын санын минимумга түшүрүү мерчемделүүдө. Мындан тышкары, корукка кирүү үчүн төлөнгөн акыны автоматташтыруу каралып жатат. Ошондой эле туристтердин коруктун ичинде жүрүүсүн чектеп, көл жээгиндеги тамак-аш саткан жайлар жабылат. Ал эми жергиликтүү эл макулдашуу талабын аткарса коруктан түшкөн акчадан айылга сувенир чыгарган цехтерди, бал таңгактоочу ж.б. ишканаларды ачып берүү пландалууда", — деди Ибраев.
Ошондой эле ал корукта туристтик фирмалар үчүн атайын расписание түзүү аркылуу коноктордун келишин тартипке келтирүү максатталып жатканын кошумчалады.
