Аскерге чакырууну уюштуруу жергиликтүү бийликке жүктөлдү
© Sputnik / Асел Акмат
Жазылуу
Мамлекеттик кызмат жана жергиликтүү өз алдынча башкаруу иштери боюнча агенттиктин бөлүм башчысы Таалайгүл Мамасалиева айыл өкмөттөргө дагы бир жаңы милдет артылганын айтты.
Айыл өкмөттөргө мыйзамга ылайык тикелей 24 милдеттеме жүктөлгөн. Быйылтан баштап аскерге чакыруу дагы жергиликтүү өз алдынча башкаруу тармагына жүктөлдү. Эми бул иш менен министрлик эмес, шаар мэриялары жана айыл өкмөттөрү алектенет. Бул тууралуу Таалайгүл Мамасалиева Sputnik Кыргызстан радиосуна маек куруп жатып билдирди.
Аскерге чакырууну уюштуруу жергиликтүү бийликке жүктөлдү
Анын айтымында, айыл өкмөттөрдүн тикелей милдеттеринен сырткары, 189 мыйзамда тапшырмалар берилген.
"Бизде, тилекке каршы, жергиликтүү өз алдынча башкаруу тармагынын түйшүгү көп. Буга чейин айыл өкмөттөрдүн аткара турган тикелей 24 милдети болсо, учурда дагы бирөө кошулуп 25 болду. Эми аскерге чакырууну уюштуруу иштери да жергиликтүү бийликке жүктөлдү. Мындан сырткары, ар кайсы тармактагы 189 мыйзамда муниципалитеттерге ар кандай деңгээлдеги тапшырмалар берилген. Каржы булактары, айыл өкмөттөрдү дотациядан чыгарууну эске албаганда да, кадр маселесин айта турган болсок, 5000ден ашуун жергиликтүү бийлик кызматкерлери болсо, алардын 3000ден ашууну маданий кызматкерлер. Башкача айтканда, эмгек акыны жергиликтүү бюджеттен алып, бирок маданият тармагында иштегендер. Ооба, мэрияларга, айыл өкмөттөргө жергиликтүү калктын жашоосуна тиешелүү бардык иштерди жасоо милдети артылган. Бирок кайсы деңгээлге чейин жергиликтүү бийлик жасашы керек, кайсы деңгээлден тарта тиешелүү министрликтерге же райондук администрацияга өтөт деп аныктап албасак айыл өкмөт, мэриялардын жүгү көп болуп жатат", — деди Мамасалиева.
Ал айыл өкмөттөрүнө стимул берүү максатында берилип келген гранттын өлчөмү быйыл 3 миллион сомдон 5 миллион сомго көбөйтүлгөнүн кошумчалады.
