Абаева: төрөй албай жүргөн аялдардын 30-60%ында эндометриоз кездешет
© Sputnik / Асель Сыдыкова
Жазылуу
Кыргыз мамлекеттик медициналык кайра даярдоо жана квалификацияны жогорулатуу институтунун акушерлик, гинекология жана репродуктология кафедрасынын ассистенти Тунук Абаева тукумсуздуктун себептери тууралуу айтып берди.
Тукумсуздуктун эӊ негизги себептерине жагымсыз экологиялык шарт, кеч куракта балалуу болууну чечүү, эндокриндик маселе (гормоналдык өзгөрүүлөр), терс адаттардын (тамеки чегүү, ичимдик) жатын моюнчасынын жана жатын түтүктөрүн бузушу, ошондой эле ар кандай өнөкөт оорулар, салмактын ашыкча жана аз болушу да кирет. Бул тууралуу Тунук Абаева Sputnik Кыргызстан радиосунун эфиринде маек куруп жатып билдирди.
Абаева: төрөй албай жүргөн аялдардын 30-60%ында эндометриоз кездешет
Анын айтымында, тукумсуздук менен жабыркаган аялдардын 30-60 пайызында эндометриоз кездешет.
"Эгерде контрацепция колдонбогон жубайлар 12 айда кош бойлуулукка жетише албаса, анда тукумсуздук маселеси жаралды деп эсептелет. Мындай жубайлар сөзсүз түрдө дарыгерге кайрылып, дарылоосун башташы зарыл. Тукумсуздук бул өкүм эмес. Жогоруда айтылган патологиялардан арылып же болбосо экстракорпоралдык уруктандыруунун аркасында балалуу болуу мүмкүнчүлүгү бар. Тукумсуздук менен жабыркаган аялдардын 30-60 пайызында эндометриоз (жатындын былжыр челинде эндометроиддик кыртыштын өсүшү менен мүнөздөлгөн оору) кездешет. Бул шишикчелер организмге коркунуч алып келбейт. Бирок балалуу болууга тоскоолдук жаратат. Ошондой эле жаш кыздардын арасында да ар кандай инфекциялардан, башаламан же эрте башталган жыныстык жашоодон жана өз учурунда гинекологго кайрылбагандан улам жатын моюнчасынын рагы пайда болуп, бул дагы тукумсуздукка алып келүүдө. Кыргызстанда профилактикалык эмдөө календарына ылайык, 2022-жылдын 14-ноябрынан тартып 11 жаштагы кыздарды адамдын папиллома вирусуна каршы эмдөө жүрүп жатат. Бул жатын моюнчасынын рагын алдын алат", — деди Абаева.
Ал илим боюнча жубайлар балалуу болууга үч ай даярдык көрүшү керектигин кошумчалады.
