Дүйшембиев: даяр маалымат алып көнгөн муундун келечеги коркунучтуу
© Sputnik / Асель Акмат
Жазылуу
Улуттук илимдер академиясынын Бегималы Жамгырчинов атындагы Тарых, археология жана этнология институтунун этнология бөлүмүнүн башчысы, доцент Саламат Дүйшембиев Евразия чөлкөмүндө маалыматтык коопсуздук маселеси орчундуу болуп турганын айтты.
Албетте, интернеттин пайдалуу жактары дагы бар. Бирок анда маалыматтар иргелбегендиктен жаштар бир маселени өз алдынча талдоодон алыстап бара жатышат. Мындай пикирин Саламат Дүйшембиев Sputnik Кыргызстан радиосуна маек куруп жатып билдирди.
Дүйшембиев: даяр маалымат алып көнгөн муундун келечеги коркунучтуу
Анын айтымында, интернет айдыңындагы даяр материалдар адамдардын эки жаат болуп бөлүнүп-жарылуусуна, агрессивдүү чекке жетип бири-бирин жектешине алып келип жатат.
"Евразия чөлкөмүндө маалыматтык коопсуздук жөнүндө олуттуу ойлоно турган абалга келип жеттик. Чексиз мейкиндик болгон интернетте ар түрдүү маалыматтар бар. Биздин аймакта аны электен өткөрүп, адамдарга жакшысын сунуштаган механизм жок. Азыр жалпы адамзат ушундан жабыркап жатат десек да болот. Педагог катары жаш муундун ушул интернеттен даяр материалдарды алып, ошону өзүнүн пикири кылып сиңирип жаткандарына, ар кандай кызыкчылыктарды камтыган, түрдүү багыттагы маалыматтарга сугарылып жатканына ичим ачышат. Мындай муундун келечеги кооптуу. Маалыматты талдабай сиңирген адамдардан жетелеме коом түзүлөт. Буга өзгөчө социалдык тармактардын салымы чоң болууда. Азыр адамдар жеке табитине же кызыкчылыгына карап гана маалымат алып калышты, ушул багыттагы гана контентти интернет өзү сунуштайт. Ал эми тереңинде ал адамдын интеллектуалдык деңгээли канчалык, билими кандай, акты карадан айырмалай алабы, талдап анализ жасайбы деген суроолор ачык бойдон калууда", — деди Дүйшембиев.
Ал маалымат коопсуздугунда курмандыкка айланбаш үчүн азырынча ар бир адам өзүн өзү гана көзөмөлдөшү зарылдыгын кошумчалады.
