Кыргызстанда аймактарды башкаруунун жаңы модели иштелип чыгат. Жаңы жарлык
20:26 18.10.2022 (Жаңыртылды: 22:46 18.10.2022)
Жазылуу
Мамлекет башчы министрлер кабинетинин жетекчисине аймактык реформа боюнча бир нече тапшырма берди.
БИШКЕК, 18-окт. — Sputnik. Президент Садыр Жапаров "Кыргыз Республикасынын административдик-аймактык түзүлүшүн өркүндөтүү жана региондорду өнүктүрүү боюнча андан аркы чаралар жөнүндө" жарлыкка кол койду. Бул туурасында мамлекет башчынын маалымат кызматынан кабарлашты.
Анын максаты — өлкөнүн административдик-аймактык түзүлүшүн андан ары өркүндөтүү, аймактардын туруктуу өнүгүүсүн камсыз кылууда материалдык, финансылык ресурстарды натыйжалуу пайдалануу, региондордо калкка көрсөтүлүүчү мамлекеттик, социалдык жана тейлөө кызматтарынын жеткиликтүүлүгүн жана сапатын жогорулатуу экени айтылды.
Министрлер кабинети үч айлык мөөнөттө белгиленген тартипте орто мөөнөттүү мезгилде Кыргызстандын административдик-аймактык түзүлүшүнүн жана региондорун өнүктүрүүнүн бирдиктүү концепциясын жана аны ишке ашыруунун жол картасын бекитүү тапшырмасын берген.
Анда төмөнкүлөр тапшырылган:
коомдун жана мамлекеттин учурдагы керектөөлөрүнө жооп берген, өлкөнүн жаңы түзүлгөн административдик-аймактык бирдиктеринде башкаруунун жаңы системасын киргизүү менен административдик-аймактык түзүлүштүн жаңы модели жөнүндө мыйзам долбоорун иштеп чыгуу;
аймактык мейкиндикти пландаштыруунун заманбап методдорун жана инвестициялык активдүүлүккө дем берүүнүн жаңы механизмдерин колдонуу менен райондорду адистештирүүгө жана өнүктүрүүнүн ири таяныч борборлорун түзүүгө негизделген региондорду комплекстүү социалдык-экономикалык өнүктүрүүнүн мамлекеттик программасынын долбоорун түзүү;
калктын санына жана калктуу конуштардын (шаар, айыл) тибине жараша региондордогу калк үчүн инженердик-коммуникациялык жана социалдык инфраструктуранын жеткиликтүүлүгүнүн региондук стандарттарынын системасын иштеп чыгуу;
аймактарды көрктөндүрүү жана жергиликтүү калктын жашоо шартын жакшыртуу боюнча шаарлар жана айылдык калктуу конуштар үчүн кыйла маанилүү долбоорлорду ишке ашырууга багытталган жергиликтүү коомчулуктун демилгелерин мамлекеттик субсидиялоо системасын киргизүү;
жергиликтүү коомчулуктардын жана жергиликтүү өз алдынча башкаруу органдарынын түздөн-түз катышуусу жана көзөмөлү менен аймактык деңгээлде өнүктүрүү бюджетин түзүү.
