Карашев: административдик-аймактык реформа ойдогудай ишке ашпай келет
© Sputnik / Асель Сыдыкова
Жазылуу
Жогорку Кеңештин VI чакырылышынын депутаты, коомдук жана саясий ишмер Аалы Карашев административдик-аймактык реформа жүргүзүүгө бир нече жолу аракет болгонун белгиледи.
Өлкөдө төрт баскычтуу башкаруу иштейт. Анткен менен республикалык жана жергиликтүү бюджет болуп эки баскычта гана чечим кабыл алууга мүмкүндүк бар. Бул тууралуу Аалы Карашев Sputnik Кыргызстан радиосуна маек куруп жатып билдирди.
Карашев: административдик-аймактык реформа ойдогудай ишке ашпай келет
Анын айтымында, административдик-аймактык реформаны ишке ашырууда кандай модель иштей турганын аныктап алуу керек.
"Кыргызстанда административдик-аймактык реформа жасоого бир нече жолу аракет жасалган. Соңку 20 жылдын ичинде 3-4 жолу аракет болгон. 2007-жылы президенттин буйругу менен бекитилип концепция кабыл алынган. 2012-жылы өкмөттүк комиссия түзүлүп административдик-аймактык реформаны баштоо аракети көрүлгөн. Мына ошондо жылыш болгон. Анда облустук деңгээлдеги структураларды, губернатор институту жоюлуп, өкмөттүн облустагы өкүлү иштеп баштаган. Ошол концепцияларда этаптары белгиленип, облустар кыскартылып, райондор ирилештирилмек. Андан кийин айыл өкмөттөрдү бириктирүү мерчемделген. Бирок мунун баары ойдогудай ишке ашкан жок. Ошондуктан бул багытта реформа баштаарда мамлекеттик башкаруу системасынын кандай модели керектигин аныктап алуу зарыл. Мисалы, учурда борбордук, облустук, райондук жана жергиликтүү өз алдынча башкаруу органдары болуп төрт баскычтуу башкаруу иштейт. Анткен менен маселени чечип, иш алып барган республикалык жана жергиликтүү эле бюджет бар. Ал эми облустук жана райондук деңгээлдеги башкаруулар негизинен өкүлчүлүктүн функциясын аткарып калууда. Ошондуктан аларга карата "лента кесип эле жүрөт" деген таризде сындар айтылууда", — деди Карашев.
Ошондой эле ал экономикалык жактан күчтүү айыл аймактарды түзүү дагы натыйжа берерин кошумчалады.
