Байдалиев: кара көө аныкталган эгинди тоют катары колдонсо болот
Жазылуу
Айыл чарба министрлигинин Айыл чарба өсүмдүктөрүн экспертизалоо департаментинин үрөндү сертификациялоо бөлүмүнүн башчысы Дамир Байдалиев фермерлерге таратылган үрөндөн аныкталган кара көө тууралуу айтып берди.
Кара көө аныкталган дан эгиндери үрөн катары колдонуудан чыгарылат. Бирок аны тоют катары колдонсо болот. Бул тууралуу Дамир Байдалиев Sputnik Кыргызстан радиосуна маек куруп жатып билдирди.
Байдалиев: кара көө аныкталган эгинди тоют катары колдонсо болот
Анын айтымында, учурда кара көө Талас, Чүй, Ысык-Көлдөгү айдоо жерлерден аныкталган.
"Өткөн жылдагы кургакчылыктан улам өлкөдө үрөн жетишсиз даярдалган. Мындан улам Айыл чарба министрлиги азык-түлүк коопсуздугун камсыздоо үчүн сырттан үрөн алып келген. Жазында эки миң тонна буудай, 3,5 миң тонна арпа жана буурчак, сафлор, күн карама, беденин үрөндөрү келген. Баарынын тийиштүү сертификаты бар болчу. Өлкөдө оптималдаштыруудан улам 40 лабораториядан 19у калган. Ошолордон текшерүү өткөрүлүп, эч кандай оору аныкталган эмес. Анын ичинен фермерлерге таратылган 277 тонна арпанын "вакула" сортунан кара көө илдети Талас, Ысык-Көл жана Чүйдүн фермерлеринин айдоосунан аныкталууда. Аталган илдет эки этап менен өнүгөт. Бирнчиси инкубациялык мөөнөт, экинчисинде тарай баштайт. Бул инфекция үрөнгө жабышат, аны аныктоо дээрлик мүмкүн эмес. Үрөн эгилген соң өсүмдүк менен кошо өнө баштайт. Анан өсүмдүктүн согу менен данга чыгып, тегеретесине жайылат. Мына ошол илдет аныкталганда өсүмдүктү үрөндүк себүүдөн алып, чарбалык багытта колдоно берсе болот", — деди Байдалиев.
Ошондой эле ал үрөндү саткан фирманын жетекчисине маалымат берилип, ал өлкөгө чакыртылганын кошумчалады.
Белгилей кетсек, буга чейин Жогорку Кеңеште депутаттар фермерлерге берилген үрөндөн өтө кооптуу инфекция аныкталып жатканын маалымдаган. Кийин Айыл чарба министрлиги жыйын өткөрүп, маалыматты тастыктап, бирок илдеттин аныкталышы түшүмгө терс таасирин тийгизбей турганын белгилеген.
