Бөрүбашов: курултай институтун ыйык көрүп асмандатып жибербеш керек
10:25 28.04.2022 (Жаңыртылды: 13:28 06.05.2022)
Жазылуу
Президенттин кеңешчиси, юридика илимдеринин доктору Бекбосун Бөрүбашов курултай маселеси соңку 15-20 жылдан бери көтөрүлүп келе жатканын белгиледи.
Парламент өзүнүн өкүлчүлүк функциясын аткара албай курултай маселеси көтөрүлдү. Бирок бул институтту ыйык көрүп, аны асмандатып жибербеш керек. Мындай пикирин Бекбосун Бөрүбашов Sputnik Кыргызстан радиосуна маек куруп жатып билдирди.
Бөрүбашов: курултай институтун ыйык көрүп асмандатып жибербеш керек
Анын айтымында, коомчулуктагы "Жогорку Кеңеш турганда курултай институтунун зарылдыгы барбы?" деген суроолор жөндүү.
"Курултай маселеси соңку 15-20 жылдан бери көтөрүлүп келген. Буга себеп — парламенттин өкүлчүлүк функциясын аткара албай калганында. Жогорку Кеңеште элдин үнү жаңырып, көйгөйү көтөрүлүп турганда курултай маселеси көтөрүлбөйт эле. 2010-жылдагы Конституциянын 52-беренесине курултай маселеси кирип, бирок бул багытта мыйзам кабыл алынган эмес. Башкача айтканда, Конституциянын 52-беренеси иштеген жок. Анткен менен айрымдар бийликтен четтеп калганда курултайчыларды чогултуп, мыйзам кабыл алып берүүнү убадалап жүрүштү. Ал эми 2021-жылы кабыл алынган Конституциянын төрт беренесинин алты жеринде жазылган. Анда курултайдын статусу коомдук жыйын катары көрсөтүлгөн. Бирок саясий системанын ичине киргизилген. Анткени бийликтин бардык органдары менен иштешет. Учурда бул боюнча конституциялык мыйзам иштелип чыгып, президентке жөнөтүлдү. Ошол эле учурда курултай институту иштей баштаса эле бардык маселе, көйгөй чечилет деп аны ыйык тутуп асмандатып жибербеш керек. Өлкөдө 1992-жылдан бери курултай өтүп келе жатат. Алгачкысында жакшы маселелер чечилгени менен кийин ага "дежур аксакалдар" кирип бийликтин камчысын чаап калышты. Ошондуктан курултайдын мыйзамы жакшы жазылышы шарт. Анда курултайдын ыйгарым укуктары менен кошо жоопкерчилиги дагы жазылуусу зарыл. Эгерде өз функцияларын аткара албаса, аны таркатып жиберүү механизмдерин дагы киргизүү керек", — деди Бөрүбашов.
Ошондой эле ал курултай институтуна мыйзам демилгелөө функциясы берилгенин кошумчалады.
