Тажияда мал сойбой калдык, талапты чоңдор да аткарсын. Учкун айылынан репортаж
17:26 11.04.2022 (Жаңыртылды: 17:27 11.04.2022)
© Sputnik / Эмиль Садыров , Акылбек Батырбеков
Жазылуу
Ош облусунун Кара-Суу районуна караштуу Учкун айылы тажияда мал союудан баш тартты. Буга президенттин маркумду узатуудагы чектөөлөр тууралуу жарлыгы түрткү болгон.
Sputnik Кыргызстан агенттигинин кабарчысы элеттеги элдин ички эрежелери менен таанышып келди.
Учкун айылынын башчысы Салижан Досматовдун айтымында, жарлык чыккандан бери үч жолу тажия болду. Үчөөндө тең мал союу, казан асуу, жыт чыгаруу деген болгон жок.
"Тажия күнү сөөктү алып барып жерге беришет. Казан асылбайт, кан чыгарылбайт. Үч күн же бир аптадан кийин ихсан кылып аксакалдарды чакырып коюп атышат. Анда да бир эле кой союлат", — деди айыл башчы.
Айыл тургуну Айтибай Салибаевдин жакында эле жеңеси каза болуп, маркумду ички эрежелерге баш ийүү менен узатышканын билдирди. Ошондой эле ал мындай учурда бийлик өкүлдөрү үлгү болушун талап кылды.
"Аксакалдар барып "союш союлбасын, чыгым болбосун" дешти, ошого макул болдук. Эгер сойсо балдарынын мүмкүнчүлүгү бар эле. Төрт баласы тең Кореяда иштеп келген. Бир аптадан кийин бир кой союп, аксакалдарды чакырып, кыркылыгы баарын бир кылып эле катма окутуп койдук. Ошол жетекчиликтегилер өздөрү үлгү болушу керек да. Атасы өлсө мал сойбой эле бизге окшоп турса… Анан, албетте, бир министрдин апасы өлсө эки бээ сойсо, кембагал дагы сойгусу келет", — деди Салибаев.
Ушул эле айылдын жашоочусу Алтынбек Маматовдун былтыр эжеси менен кызы жол кырсыгынан каза болгон. Анын үй-бүлөсү ички эрежелерге моюн сунуп, аткарып жатканын айтты.
"Бизге келгендер куран окуп эле кетип жатышат. Эч кандай союш союлган жок. Бул жерде колунда бары бар, жогу бар. Ошого карап баары тегиз болсо жакшы болот да, элге да жеңил болмок", — деди Маматов.
Айылдыктар маркумга арналган каадаларды 7 жыл мурун эле чектеген. Бирок тажия күнү бодо мал, жылкы союуну токтото алышкан эмес.
"Мурда үчүндө, бейшембилигинде дагы кой союп, кыркылыгында колунда болсо жылкы же бодо мал союп келген. Айыл башчы жаштар менен сүйлөшүп, ыксыз чыгымдарды токтотконбуз. Муну эл дагы колдоп, жакшы бир жолго түшүп калды", — деди айылындагы мечиттин имамы Урматбек Закиров.
Учкун айылынын активдери эми тойлорго дагы чектөө киргизип, ашыкча чыгымдардан арылууну пландап жатат.
Белгилей кетсек, Жогорку Кеңештин депутаттары да той-аштагы ысырапкерчиликти чектеген мыйзам долбоорун демилгелеген.
Тема боюнча:
