Жунушалиев: өлкөдө балык ветеринары — ихтиопатологдор жок
Жазылуу
Балык чарба департаментинин суу обьектилерин паспорттоштуруу жана балык реестрин жүргүзүү бөлүмүнүн жетектөөчү адиси Кыдыр Жунушалиев өлкөдө балыктын эки түрү өстүрүлө турганын белгиледи.
Балык чарбачылыгы өлкөдө жакшы өнүгүп келе жатат. Бирок бул тармакты тейлеген адистер жок болууда. Мындан улам Түркиядан балык ветеринарларын акысыз окутуу боюнча макулдашылууда. Бул тууралуу Кыдыр Жунушалиев Sputnik Кыргызстан радиосунда маек куруп жатып билдирди.
Жунушалиев: өлкөдө балык ветеринары — ихтиопатологдор жок
Анын айтымында, өлкөдө балык багууну өнүктүрүүгө жаратылыш шарттары мүмкүндүк берет.
"Балык багуу үчүн жер жана суу ресурсу керектелет. Кудайга шүгүр, өлкөдө бул багытта ыңгайлуу жаратылыш шарттары бар. Алсак, учурда өлкөдө балык өстүрүүгө ыңгайлуу 35 миң чакырым агын суу, 666 көлмө бар. Кыргызстанда карп жана форель багылып, ушул эки багыт жолго салына баштады. Форель муздак, таза сууда багылса, карп жылуу сууда өстүрүлөт. 2019-жылдан тарта форелди өстүрүү боюнча жакшы жетишкендиктер бар. Мисалы, Россияда балык үч жылда чоңойсо, биздин шартта бир жылда товардык балык чыгып жатат. Аталган тармак жаңы болгондуктан ар кандай кыйынчылык, көйгөйлөр да кездешүүдө. Алсак, өлкөдө балык чарба тармагындагы адистер даярдалат. Бирок айрым адистиктер, мисалы, балык ветеринары — ихтиопатологдор жок болууда. Жакында Токмоктогу балык массалык өлгөн окуяда Түркиядан адис чакырттык. Ошондон кийин дал ушул багыттагы адистерди акысыз окутуп берүүнү суранып, түрк тарап макулдук берди", — деди Жунушалиев.
Ошондой эле ал балыкты туура өстүрүү боюнча департамент окутууларды өткөрүп турарын кошумчалады.
