Бакытов: жылына бир миллион 200 миң баш тооктун этин чыгарабыз
Жазылуу
Канаттуулар фабрикасынын директору Марат Бакытов башында бройлер канаттуусун туура эмес баккандыктан миңге жакын тоок өлүп калган учурлар болгонун айтты.
Канаттуулар фабрикасында 19 жашынан тарта иштеген Марат Бакытов тоок багууну ошол жактан үйрөнгөнүн айтып, алгач кампа башчысы, кийин технолог болгонун баяндап берди. Ал Sputnik Кыргызстан радиосуна маек куруп, 23 жашында тоок фермасын ачканына токтолду.
Бакытов: жылына бир миллион 200 миң баш тооктун этин чыгарабыз
Бакытовдун айтымында, бройлер канаттуусу үй тоогуна салыштырмалуу өтө назик, атайын кам көрүүнү талап кылган тукум.
"Алгач Өзбекстандан бройлер тооктун жумурткасын алып келип, андан жөжөлөрдү чыгарып, сатыкка койдум. Башында 300 баш жөжө менен баштасам, бара-бара көбөйттүм. Бир жылдан кийин кардарлардын саны 600 кишиге жетип, жумасына 10-15 миң жөжө саттым. Убакыттын өтүшү менен Голландиядан бройлер тоок жумурткасын алып, бул канаттуунун түрүнүн генетикасын изилдеп, ага жараша рацион дагы даярдадык. Интернеттен алган теориялык маалыматтар бизге багыт бергени гана болбосо, иш жүзүндө канаттууну өстүрүүгө толук жардам берген жок. Алгач канаттууларды чоң мал баккансып эле сарайларда кармап багып жатып, миңге жакыны өлүп калган учурлар болду. Негизи бройлер канаттуусу үй тоогуна салыштырмалуу өтө назик, атайын кам көрүүнү талап кылган тукум. Азыр биздин фабрика кыска мөөнөттүн ичинде инкубациялык жумурткадан жөжө чыгарып, этке чейин өстүрүп даярдаган толук өндүрүш циклинен турган заманбап технологиялык жабдуу менен жабдылган. Ишкананын аймагында инкубатор, тоют цехи, канаттуу багуучу жай, мал союучу цех бар. Канаттуулар фабрикасында жаңы тоок сарайлар жана ферма (анын ичинде кондиционерлер жана тоют блоктору) курулган. Канаттуулар тоюттарын даярдоочу жабдуулар, союу линиялары жана инкубаторлор жаңы жабдыктарга алмаштырылган, этти тоңдуруучу жайлар кеңейтилген. Тоют жана суу менен камсыз кылуунун бардык процесси автоматташтырылган. Тоютту өзүбүз даярдайбыз. Анын сапаттуу жана экологиялык жактан таза болушу биз үчүн чоң жоопкерчилик. Азык-түлүк коопсуздугун катуу сактап, тоюттун сапаты тынымсыз текшерилет. Ошондой эле ай сайын Кыргызстандарт этте химикат, антибиотик жок деген сертификат берет", — деди Бакытов.
Ал бардык жумуштарды автоматташтыруунун арты менен азыр канаттуулар фабрикасы үч айда 300 миң баш, ал эми жылына бир миллион 200 миң даана тооктун этин сатыкка чыгарарын кошумчалады.
