Кыдыкманов: фермер, ишкерлерге 6% үстөгү менен насыя берилет
© Sputnik / Асель Сыдыкова
Жазылуу
Айыл чарба министрлигинин талдоо жана стратегиялык пландоо бөлүмүнүн башчысы Эмил Кыдыкманов айыл чарбасын каржылоого 474 миллион сом каралганын маалымдады.
Соңку сегиз жылда айыл чарбасынын өсүү темпи 18,1 пайызды түздү. Бул тууралуу Эмил Кыдыкманов Sputnik Кыргызстан радиосунда маек куруп жатып билдирди.
Кыдыкманов: фермер, ишкерлерге 6% үстөгү менен насыя берилет
Анын айтымында, аталган тармактын өсүшүнө 2013-жылдан бери "Айыл чарбасын каржылоо" долбоору өбөлгө болуп жатат.
"Өлкөдө айыл чарбасын каржылоо долбоору 2013-жылдан бери практикаланууда. Мына ушул сегиз жыл ичинде айыл чарба тармагында иштеген 112 субъектиге баш-аягы 46 миллиард сомдон ашык каражат берилген. Бул аталган тармакты өнүктүрүүгө жакшы түрткү болду. Алсак, соңку сегиз жылда айыл чарбасынын өсүү темпи 18,1 пайызды түздү. Мындан сырткары, айыл чарба продукцияларынын дүң өндүрүмү 125 миллиард сомго жетти. Буга чейин мал чарбасына жана өсүмдүк өстүрүүгө насыялар 10 пайыздык үстөк менен берилип келген. Быйыл үстөгү алты пайызга түшүрүлүп, асыл тукум чарбаларга, үрөн даярдаган субъектилерге, балык, тоок багуучуларга, аарычылык жана тоют менен алектенгендерге, тамак-аш жана кайра иштетүү тармагына берилет. Айыл чарба тармагын каржылоого жалпы 474 миллион сом каралууда", — деди Кыдыкманов.
Ошондой эле ал берилген каражаттын максаттуу пайдаланылып жатканы боюнча көзөмөл министрлик жана коммерциялык банктар тарабынан жүргүзүлө турганын кошумчалады.
