Өтө кызганчаак адамдын тилин таап жашоого болобу? Психологдун жообу
© AFP / SEBASTIEN BOZON
Жазылуу
Адис адамдын өзүнө ишенбестиги сөзсүз түрдө кызганууну жаратарын айтып, кандай болсо өзүн ошондой кабыл алууга үйрөнүшү керектигин белгилеген.
БИШКЕК, 22-янв. — Sputnik. Психолог Бермет Наралиева кызганчаак адамдын тилин табуунун жолун жана бул сапаттан кантип арылса болорун Sputnik Кыргызстан агенттигине берген маегинде түшүндүрүп берген.
Адис баары каалоодон көз каранды экенин айтып, адам менен бир пикирге келүүгө болорун белгилеген. Ошондой эле кызганычты кантип жеңүү керектигин түшүндүргөн.
"Бул сезимди адам өзү жаратат. Түгөйү кызганууга эч кандай жол бербей татынакай жүрсө деле аңдып, шекшип, күмөнү күчөп, ичинен ар кандай сценарийлерди түзүп алгандар болот. Бул — олуттуу психологиялык илдет. Кызганчаак аялбы же эркекпи, ал өз оюнун, драмасынын автору. Жашоодо ишеним деген чоң күч бар. Эгер адам түгөйүнө ишенип, шектене бербей башындагы таштандыдан арылса, бакубат, тынч өмүр сүрүшү мүмкүн. Оюн, эмоциясын көзөмөлдөй албаган адам өмүрлүк жарын акыры көчөдөгү зым карагайдан деле кызганып калышы ыктымал. Чектен ашкан кызганчаактыктын түбү балалыктан алган жараатына да байланыштуу. Же жеке өзүнө берген баасынын төмөндүгүнөн болот. Ата-бабалар "тең-теңи менен, тезек кабы менен" деп бекер айтпаган, ар бир адамдын өмүрлүк жары билими, интеллекти, аң-сезими боюнча да түгөйүнө тең келе турган деңгээлде болсо кызганыч чектен ашпайт", — деген психолог.
Наралиева адамдын өзүнө ишенбестиги сөзсүз түрдө кызганууну жаратарын айтып, кандай болсо өзүн ошондой кабыл алууга үйрөнүшү керектигин белгилеген. Анын айтымында, өзүн баалаган, жакшы тааныган адам ашыкча кызганбай калат.
