Суукка кабылганда дароо ысык ичип, жуунбагыла! ӨКМдин кеңеши
© Sputnik / Кирилл Каллиников
Жазылуу
ӨКМ сууктан сактануунун жана ага кабылгандан кийинки аракеттер тууралуу кеңеш берди. Адам өмүрүнө коркунуч жаралган учурда 112 кызматына чалууну эскертти.
БИШКЕК, 22-дек. — Sputnik. Өзгөчө кырдаалдар министрлиги бийик тоолуу жана тоолуу аймактарда суук катуу болорун белгилеп, сууктан сактануунун эрежелерин эске салды.
Ага ылайык, төмөнкү нерселерди көңүлгө түйүп алуу сунушталат:
аба ырайы кескин өзгөрүп, нормадан ашкан суукта зарыл ишиңиз болбосо үйдөн чыкпаганыңыз оң. Айрыкча бул жаш балдарга тиешелүү;
катуу бороон коштогон суукта ачка жүрбөңүз. Себеби организм суукка кабылганда жылуулукту өзүңүздөн эмес, тамактын эсебинен алганы пайдалуу;
сыртка чыгарда колуңузга, бетиңизге сууктан сактай турган майлуу кремдерди сүйкөңүз. Бет майдын курамында суу, тактап айтканда, нымдаштыруучу заттар болбошу керек;
жылуу жүргөнгө аракет кылыңыз. Кийимди табигый кездемеден тигилгенин, жүндөн токулганын тандаңыз. Ошондой эле кийим жеңил жана ыңгайлуу болушу керек. Мындан сырткары, жылуулукту бир калыпта сактоочу атайын кийимдер (термо) да жакшы;
бут кийим кургак жана кенен болушу шарт. Ыңгайлуу бут кийим тамандагы кан айланууга тоскоол болбойт, өзүңүз да кыйналбай жүрөсүз. Суукта жүндөн же таза пахтадан токулган байпак кийген да дурус;
аялдамада же көчөдө турганда бир абалда турбастан, буту-колуңузду кыймылга келтирип туруңуз;
суукка чыдабай жатсаңыз жылуу жайларга — кафе, дүкөн, көп кабаттуу үйлөрдүн подъезддерине кирип жылына туруңуз;
жай дем алыңыз. Суукта терең дем алуу өпкөгө жана аны туташтырган тамырларга зыян. Ошондой эле сууктан мурун, кулак, колу-бутту да сактоо керек;
эгер сууктан буту-колуңузду сезбей калсаңыз дароо ысык сууга жуунбаңыз. Бул организмдеги клеткалардын эрте өлүп жок болушуна (некроз) алып келет. Жакшысы — үшүк алган дененин бөлүгүн кургак, жылуу же жүндөн токулган табигый кездеме менен ороп жылытыңыз. Бул жардам бербесе дарыгерге кайрылуу зарыл;
сырттан үшүп киргенде дароо ысык чай ичкенге же ысык сууга жуунганга (душ, ванна) шашылбаңыз. Организмдеги температура кескин өзгөргөндө жүрөк-кан тамыр системасына күч келет. Адам организми 20-30 мүнөт аралыгында акырындык менен бөлмө температурасына ылайыкташып көнүшү керек;
ар бир адамдын коопсуздугу өз колунда. Спорттун муз тебүү түрү менен машыккандар жана ага кызыккандар, этияттаңыздар. Өзгөчө ачык жерде машыккандар кар жааган күндүн эртеси муз аянтчасына барганы дурус. Кооптуу, тик дөбөлөрдөн, тоо боорунан, текшерүү жүргүзүлбөгөн муз аянтчаларына барууга тыюу салынат;
аба ырайы тууралуу маалыматтарга көз салып, ошого жараша жолго чыгыңыз;
бороондо эскертүүсүз электр энергиясы өчүп калышы толук мүмкүндүк бар. Кооптуу электр чубалгыларына көз салыңыз, газ түтүгүн бекитиңиз;
бороон-чапкында автоунааны бак-дарактардан алысыраак жакка токтотуңуз.
ӨКМ, мындан сырткары, кыйроолор коштолгон же адам өмүрүнө коркунуч жаралган учурда 112 кызматына чалууну эскертти.
