Абдувалиева: Кыргызстанда ара төрөлгөндөрдүн саны 4-5%ды түзөт
11:10 18.11.2021 (Жаңыртылды: 14:27 14.12.2021)
Жазылуу
Эне жана баланы коргоо борборунун оорулуу ымыркайлар жана ара төрөлгөн балдар бөлүмүнүн башчысы Сагынбү Абдувалиева маалынан эрте көз жаруунун биринчи себеби бул тондун оорусу экенин айтты.
Кыргызстанда жылына 150-160 миң бала жарыкка келсе, алардын ичинен 4,5-5 пайызы ара төрөлүп жатат. Биздин мамлекетте 2004-жылдан бери 22 апта, 500 грамм, бою 25 сантиметр же андан жогору болгон ымыркайлар ара төрөлгөн бала деп эсептелип келген. Учурда салмагы 1000-1500 граммдан төмөн наристелер маалынан эрте төрөлгөндөргө кирет. Бул тууралуу Сагынбү Абдувалиева Sputnik Кыргызстан радиосунун эфиринде маек куруп жатып билдирди.
Абдувалиева: Кыргызстанда ара төрөлгөндөрдүн саны 4-5%ды түзөт
Анын айтымында, дүйнөдө жарыкка маалынан эрте келген ымыркайлардын саны 6-8 пайызды, ал эми Кыргызстанда 4-5 пайызды түзөт.
"Маалынан эрте көз жаруунун биринчи себеби бул тондун оорусу (преэклампсия) болуп саналат. Мында жатындын тамырлары өзгөрүп, жогорку кан басым менен коштолуп, кош бойлуулук татаалдашат. Эгер экинчи даражадагы кан басымы 90дон жогору болсо биринчи даражадагы преэклампсия, ал эми кан басым 110дон жогору болсо анда оор преэклампсия делет. Мында эненин башындагы тамырлар жарылып кетиши мүмкүн. Ошондуктан ал баланы эрте төрөтүп алууга туура келет. Андан тышкары, жыныстык орган, бөйрөктөргө суук тийген учурда да бала ара төрөлөт. Андыктан кыз бала мектепте, жогорку окуу жайда окуп жүргөн кезинде эле аларга кам көрүшү керек. Экстракорпоралдык уруктандыруудан жаралган балдар да эрте төрөлүп калышы ыктымал. Кыргызстанда аялдар ар кандай себептерден улам ден соолугуна жетиштүү көңүл бөлбөй келет. Учурда дарыгерлер аялдын ден соолугунда мандем бар болсо, дарылануудан өтүү керектигин айтышат. Андыктан баланы пландоо өтө маанилүү. Өзгөчө кыргыз үй-бүлөдө келин келгенден бир жыл өткөн соң эле балалуу болдубу деп сурай беришет. Мындай түшүнүктөн алыс болууга чакырам", — деди Абдувалиева.
Адис учурда аялдар төрөт учурунда көз жаруудан эмес, башка ооруларынан улам көз жумуп калып жатканын кошумчалады.
