Самыйбек уулу: шаарлардын өнүкпөй жатканынын негизги себеби каржы көйгөйү эмес
12:37 31.10.2021 (Жаңыртылды: 14:27 14.12.2021)
© Sputnik / Табылды Кадырбеков TABA_adyrbekov
Жазылуу
Урбанист (шаар изилдөөчү) Атай Самыйбек уулу өлкөдө чакан калааларды өнүктүрүүдө негизги көйгөй акча маселеси эмес деген пикирин билдирди.
Кыргызстанда жалпысынан 32 шаар бар. Тилекке каршы, республикалык маанидеги Бишкек жана Оштон башкасында социалдык көйгөйлөр абдан көп. Мунун негизги себеби шаар бийлиги тургундар менен тыгыз иштешпегендигинде жатат. Мындай пикирин Атай Самыйбек уулу Sputnik Кыргызстан радиосунда маек куруп жатып белгиледи.
Самыйбек уулу: шаарлардын өнүкпөй жатканынын негизги себеби каржы көйгөйү эмес
Анын айтымында, аймактарды өнүктүрүүдө биринчи ишти аң-сезимди өзгөртүүдөн башташ керек.
"Бизде чакан шаарлардын өнүкпөй жатышына негизги себеп катары финансынын тартыштыгын айтышат. Бирок бул башкы себеп эмес. Тартыштыкты жойсо болот, жокту таап, барды көбөйтүү адам колунан келүүчү иш. Ал үчүн биринчи кезекте аң-сезимди өзгөртүү зарыл. Мисалы, салык төлөөчүлөр "мамлекет мага эмне кылып койду" деп эмес, "менин шаарым", "менин өлкөм" деген түшүнүк менен жашашы керек. Ал эми жергиликтүү бийлик элдин башчысы эмес, анын кызматкери болушу шарт. Бардык болуп жаткан маселелерди трибунага чыгып алып эмес, тегерек стол форматында элге жеткирип, талкуулап, бир иш жасаарда алгач анализдеп, анан кадам таштоо зарыл. Башкача айтканда, коом менен бийлик тыгыз иштешсе ар ким өз көмөчүнө гүл тарткан көмүскө экономика да жоюлат. Экономика өсөт. Анан албетте, иш билги кадрлардын келиши да маанилүү", — деди Самыйбек уулу.
Адис өлкөдөгү чакан шаарлардын дээрлик бардыгында таза суу жана даараткана көйгөйү курч турарын кошумчалады.
Эске сала кетсек, 31-октябрь — Бүткүл дүйнөлүк шаар күнү. Документ 2014-жылы БУУ тарабынан шаарларды ар тараптан өнүктүрүү максатында кабыл алынган.
Подкасттын толук вариантын видеодон көрүңүз:
