Болотова: Кыргызстанда аба акробатикасына көңүл бөлүнбөйт
12:35 31.10.2021 (Жаңыртылды: 16:09 15.12.2021)
© Sputnik / Асель Сыдыкова
Жазылуу
Аба акробатикасы боюнча дүйнө чемпиону Гүлбара Болотова 7-8 жылдан бери аталган спорт менен машыгып келе жатканын белгиледи.
Өлкөдө аба акробатикасына тийиштүү деңгээлде көңүл бөлүнбөйт. Ошондуктан көптөгөн турнирлерге ата-энелердин каражаты менен барууга туура келет. Бул тууралуу Гүлбара Болотова Sputnik Кыргызстан радиосунда маек куруп жатып билдирди.
Болотова: Кыргызстанда аба акробатикасына көңүл бөлүнбөйт
Анын айтымында, быйыл кыргызстандык сегиз спортчу алдыңкы ондукка кирген.
"Аба акробатикасы тууралуу көптөрдүн маалыматы жок. Бул спортто ийгиликтерге жетишүү үчүн тынымсыз машыгуулар зарыл. Ошондуктан дүйнө чемпионатында кыргызстандык сегиз спортчунун алдыңкы ондукка киргени жетишкендик болуп саналат. Сегиз адамдын ичинен үч спортчу биринчи орунду алганы дагы чоң ийгилик. Кыргызстанда аталган спорт түрүнө тийиштүү деңгээлде көңүл бурулбай келет. Маселен, Россиянын, Казакстандын акробаттары Олимпиада оюндарына катышууга даярдык көрүшүүдө. Алардын спортчулары негизги атаандаштарыбыз болуп саналат. Ошолор менен бир деңгээлде болгонубуз биздин спортчулардын потенциалы жогору экенинен кабар берет. Спортчулар турнирлерге ата-энелердин каржылоосу менен барат. Бул жолу чемпионат аралыктан өттү. Атайын элементтерди аткарып, аны видеого тартып уюштуруучуларга жиберилет. Аны калыстар карап өз чечимин кабыл алды. Ага катышууга даярдык көрүү абдан татаал болду. Анткени пандемияга байланыштуу үйдөн чыгууга мүмкүн эмес эле. Мындай абалда форманы сактап туруу татаалдыкты жаратат. Чемпионат залда кадимкидей өтсө бир жолу көрсөтүп коюп кирип кетесиң. Ал эми аралыктан болгондо кайра-кайра атайын элементтерди аткарууга туура келет. Ошондуктан онлайн-чемпионат кыйла татаалыраак", — деди Болотова.
Ошондой эле ал учурда кайрадан кийинки дүйнө чемпионатына кызуу даярдыктар жүрүп жатканын кошумчалады.
