Бишкекте Кыргызстандын эгемендүүлүгүнүн 30 жылдыгына арналган XIV эл аралык айтыш 30-31-август күндөрү өткөнү турат. Эгемендүүлүк майрамынан тышкары, иш-чара "Айтыш" фондунун 20 жылдыгына, Көкө уулу Өтө (Жеңижок) акындын 160 жылдыгына, Эстебес Турсуналиевдин 90 жана казак акыны Жамбыл Жабаевдин 175 жылдыгына арналууда. Бул тууралуу Абдылдажан Акматалиев Sputnik Кыргызстан радиосунун эфиринде маек куруп жатып билдирди.
Акматалиев: акындардын айтышуу маданияты кыйла өскөнү байкалды
Анын айтымында, акындар сынагынын тандоо туруна 44 акын катышкан.
"Тандоо туру 20-августта "Манас" кинотеатрында болду. Калыстар тобунун төрагасы белгилүү обончу Түгөлбай Казаков, акын Бактыгүл Чотурова, Үмүт Култаева, Назира Аалы кызы, Саламат Садыкова жана мен мүчөлүк кылдык. Сынакта саптардын мазмуну, теманы ачып бериши, көркөмдүүлүгү, ыргагы жана талапкердин айтышуу маданиятына көңүл бурдук. Тандоо турунда акындардын айтышуу маданияты кыйла эле өскөнү байкалды. Сынакка биздин 44 акын катышып, анын ичинен сегизи тандап алынды. Алар: Амантай Кутманалиев, Баян Акматов, Акматбек Султан уулу, Асылбек Маратов, Жылдызбек Төрөканов, Турат Жумаев, Кубат Тукешов жана Мундузбек Борончуев. "Берки элге таанылган чоң акындар кайда?" деген суроо көп болуп келет. Булардын басымдуусу жаш болгону менен такшалып калган акындар. Казактардан кимдер катышары белгилүү боло элек. Бизде акындардын сынагы мамлекеттик деңгээлде аз өтөт эмеспи. Ал эми казактарда бул нерсе улуттук идеологиянын бир бутагы катары эле болуп калган. Буга чейин 1995-жылы Жамбыл, Абайдын 150 жылдыгына арналган айтышына катышкам. Бизден манасчылар, дастанчылардан Роза Аманова, акындардан Тууганбай Абдиев барышты эле. Ошондо эле казактардын элдик оозеки чыгармачылыкка өтө маани беришкенин байкагам. Аларда ай сайын айтыш сынагы өтүп, чоң байгелер коюлат. Мындайча айтканда, мотивация күчтүү. Бизде болсо жылына 1-2 иш-чара гана өтөт. Бирок ошого карабай "Айтыш" коомдук фондунун жардамы менен, Элмирбек Иманалиевдин "Төкмө келсе төр бошот" теледолбоору аркылуу биз да жаш акындарды такшалтып жатабыз", — деди Акматалиев.
Академик бул акындар сынагынын тандоо туруна 16 жаштагы таланттуу жаш акын катышып, калыстарды кубандырганын кошумчалады.
