Эгемендүүлүктүн алгачкы жылдары илимий потенциалды коргоо, түзүү жана өнүктүрүү, улутка тиешелүү тил, адабият, тарыхты изилдөө жаатында адистерди даярдоо үчүн улуттук университеттин керектиги сезилди. 1992-жылы аталган окуу жайдын статусу жогорулап, өлкөнүн түптөлүшүнө эң керектүү адистерди даярдоо милдетин аткара баштады. Бул тууралуу Канат Садыков Sputnik Кыргызстан радиосунун эфиринде маек куруп жатып билдирди.
Садыков: эгемендүүлүккө жеткенден соң акысыз билим берүүнү жоготтук
Анын айтымында, эгемендүүлүктүн алгачкы жылдарында экономиканын алсыздыгына байланыштуу калкка кам көрүү, социалдык жардам көрсөтүү жагынан бардык тармак алсыз болгон.
"30 жыл — бул абдан узак мөөнөт. Башка мамлекеттер ушул убакыттын ичинде бир топ жетишкендиктерди жасады. Советтер Союзу ураган мезгил биздин мамлекет үчүн абдан эле оор жылдар болду. Өзгөчө билим берүү системасына кедергиси тийди. Эгемен өлкө болгондон кийин алгачкы жылдары жакшы жылыштарга, өзгөрүүлөргө үмүттөр болгон. Бирок союз учурунда социалдык жеңилдиктер көп эле. Алсак, акысыз билим берүү бала бакчадан баштап жогорку окуу жайларга чейин жок болду. Бирок бул артыкчылыкты өнүккөн, чоң мамлекеттер деле сактап кала албады. 1991-жылдары мугалимдердин айлык акысынын төмөндүгү маселе жаратты. Үч айлап төлөнбөй калган учурлар болгон. Ал эми ЖОЖдордо жаңы адистиктер контракттык негизде окутула баштагандан кийин бир аз мугалимдердин турмуш шарты жакшырган учурга келдик. Бул кезде өзүнө өзү кадрларды даярдоого умтулуусу Кыргызстандын негизги жетишкендиги болду. Бардык талаптарга жооп берген жогорку окуу жайлар түзүлө баштады. Ички жана тышкы коопсуздукту камсыздоо, эл аралык мамилелерди чыңдоо жаатында иштеген адистер даярдалып жатты. Ошентип Эл аралык университет, ИИМ, юридикалык академия ачылды. Андан тышкары, региондордогу жаштар ошол жерде эле билим алып, ошол жерде кызмат өтөшү үчүн жети облуста жети университет негизделди. Алгачкы он жылдын ичинде келишимдин негизинде Кыргыз-Россия Славян жана Кыргыз-түрк "Манас" университети өңдүү эл аралык окуу жайлар пайда болду", — деди Садыков.
Экс-министр 2010-жылдары айлык акынын өтө төмөн болгонунан улам мектептерде 25-30 миңдей мугалим жетишсиз болгонун кошумчалады.
