БИШКЕК, 1-дек. — Sputnik. Мамлекеттик каттоо кызматы айдоочулук күбөлүктү берген орган бир гана "Унаа" мекемеси экенин айтып, алдамчылардын тузагына түшүп калбоону эскертти.
Мекеме социалдык тармактарда Жол кыймылы коопсуздугун камсыздоо башкы башкармалыгынын базасына жеке маалыматтарды киргизүү менен айдоочулук күбөлүк алууга болот деген билдирүү чындыкка дал келбей турганын билдирди.
"Мамлекеттик каттоо кызматы мындай адамдар жарандардын ишенимине кирүү менен алдап, мыйзамсыз иштерди жасап кетерин эскертет. Жарандарды өзүнө сак жана жоопкерчиликтүү болуп, жеке маалыматтарын алдамчыларга жөнөтпөөгө чакырабыз. Айдоочулук күбөлүк алуу маселеси боюнча "Унаа" мамлекеттик ишканасына кайрылып же 119 кыска номери аркылуу кеңеш ала аласыз", — деп айтылат маалыматта.
Ведомство "Айдоочулук курамды тестирлөө", "Айдоочулук курамды каттоо", "Транспорт каражаттарын каттоо" сыяктуу маалыматтык системаларды ишке киргизгенин белгилейт. Бул программалар "Унаа" мекемесинин кызматтарын электрондук түрдө колдонууга шарт түзөт.
