БИШКЕК, 18-сен. — Sputnik. Дене табынын 37 же андан жогору градуска көтөрүлүшү дайыма эле адам ооруп калгандан кабар бербейт. Бул тууралуу Sputnik радиосуна РФтин медицина илимдеринин доктору Андрей Продеус билдирди.
Адатта 37 градустан жогорку температура кишинин ооруп жатканынан кабар берет. Бирок дарыгердин айтымында, мындай ишеним дайыма эле туура боло бербейт.
"Градусник 37ни көрсөтүп турганы менен өзүңүздү жакшы сезип жатсаңыз, дүрбөлөңгө түшүүнүн кажети жок. Негизи мындай температура кооптуу эмес. Бирок дене табы нормада болуп туруп деле абал начарласа, адам кыйналса, демек, ооруп калгандан кабар берет", — деди дарыгер.
Дарыгер иммунитетти көтөрүүдө сарымсак менен имбирдин маанисин айтты
Ал ошондой эле 37,1 деген көрсөткүч кооптуу эмес экенин белгиледи.
"Адамдын денесинин нормадагы температурасы 36,2ден 37,2 градуска чейин чыгып-түшүп турат. Дене табынын эң жогорку чеги саат 20.00 чамасында, эң төмөнү уктап жаткан маалда, саат 03.00дө катталат. Бул цифралар градусникти колтугуна салып өлчөгөндөргө тиешелүү. Анткени дене табын градусникти оозуна, жамбашына жана башка жерине коюп өлчөгөндөр болот", — деди Продеус.
Ошону менен катар медик ар дайым эле дене табынын 37 градустан жогору болушун кадимки көрүнүш катары кабылдабоо керектигин эскертет. Эгер көпкө чейин түшпөй койсо дарыгерлерден кеңеш алууну сунуштады.
