Адис вакцина алган айрым адамдардын кайра ооруп жаткан себебин айтты

Дүйнөлүк саламаттык сактоо уюму жыл сайын февраль айында, келе жаткан күз-кыш айларында грипптин кандай түрлөрү болорун алдын ала болжолдошот. Ошол болжолдуу иликтөөлөргө таянуу менен тумоого каршы вакцинаны сунушташат. Бул тууралуу Динара Оторбаева Sputnik Кыргызстан радиосунун эфиринде маек куруп жатып билдирди.

Анын айтымында, сасык тумоого каршы эмдөө 1949-жылдан бери жасалып келет.

Оторбаева: быйыл сасык тумоого каршы эмдөө сентябрдын аягында башталат

"Дүйнө жүзүндөгү мамлекеттерде ДССУнун көрсөтмөсү жок бир дагы вакцина чыгарылбайт. Ал эми көрсөтмө алган завод дароо эле массалык түрдө чыгарып жибербестен, препаратты 5-6 ай сыноодон өткөрөт. Изилдөө ийгиликтүү аяктагандан кийин гана чоң көлөмдө чыгарылат. Учурда калк арасында, ошол эле медкызматкерлер дагы сасык тумоого каршы эмдөө алсам деле ооруп калдым деп айтып келишет. Менимче, алар маалыматтын жоктугунан ушинтип айтышууда. Негизи сасык тумоонун түрлөрү көп. Вакцина ошолордун бирине гана каршы сайылат. Кайсы жылы грипптин кандай түрү жайылары алдын ала божомолдонуп, эмдөө ошого каршы жүргүзүлөт. Ал эми башка адана вирус, паротиттин төрт түрү, риновирус, коронавирус, респиратордук-синцитиалдык жана башка бир топ курч респиратордук вирустук инфекциялардын түрлөрү да бар. Адам булардын кайсы бирине чалдыкканда симптомдору окшош болгондуктан, жалпысынан эле сасык тумоо деп аталып келет. Бирок алган эмдөөсү жогорудагы вирустардын бирөөнөн гана коргой алат. Ошондуктан вакцина алса деле вирустун башка түрлөрүн илештирип алып, ооруп калышы мүмкүн", — деди Оторбаева.

Дарыгер сасык тумоого каршы вакцина алган адамдар вирустук инфекциянын башка түрүнө кабылса да оору жеңил формада өтөрүн кошумчалады.