Мукашев: КРде өндүрүлгөн эт сапаты жагынан кошуналардан кыйла артта калган

Жазылуу
Даяр эт азыгында эт менен сөөктүн катышы 60ка 40 пайыз болушу керек. Кыргызстандын этинде катыш 50гө 50 пайызды түзөт.

БИШКЕК, 12-авг. — Sputnik. Кыргызстанда асыл тукум малдарды өстүрүү дээрлик өнүккөн эмес. Мындай пикирин премьер-министрдин айыл чарба иштери боюнча кеңешчиси Азамат Мукашев Sputnik Кыргызстанга билдирди.

Ал Кыргызстандын эт өндүрүшүнүн учурдагы абалы тууралуу пикирин айтып, бул азыктарды өндүрүү боюнча биздин өлкө кошуна мамлекеттерден артта калганын белгиледи.

Анын айтымында, Кыргызстанда жайыттардын көпчүлүгү жергиликтүү өз алдынча башкаруу органдарынын алдындагы жайыт комитеттердин карамагында. Өлкөдөгү малдын көпчүлүгү элдики.

"Көбүнесе фермерлерде жайыттарды жана тоют жерлерин кайра бөлүштүрүүдө талаш-тартыш пайда болот. Бул жалгыз көйгөй эмес. Кыргызстандын эт азыгынын сапаттык көрсөткүчтөрү, мисалы, эттин сөөккө карата катышы, ветеринардык талаптардын сакталышы боюнча Кыргызстан коңшу мамлекеттерден кыйла артта калган",  — дейт Мукашев.

Анын айтымында, негизи даяр эт азыгында эт менен сөөктүн катышы 60ка 40 пайыз болушу керек. Кыргызстанда бул 50гө 50 пайызды түзөт.

"Мындай этти миң чакырым аралыкка ЕАЭБ өлкөлөрүнө ташуу өзүн актабайт, анткени арык этке эч ким кымбат акча төлөгүсү келбейт. Керек болсо биздин жергиликтүү эт өндүрүүчүлөр да кышында этти Беларустан алып келишет, анткени аларда бул коэффициент бир кыйла жогору", — деген адис.

Жыл башынан бери өлкөдө өндүрүлгөн эт, сүт жана жумуртка. Статистика

Ал кошумчалагандай, мурда ата мекендик фермерлер асыл тукум малды өстүрүшкөн жана эттин сапаты жогору болгон. Акыркы маалда бул багытта эч ким иш жүргүзбөйт. Малдын асылдуулугун арттыруу үчүн фермерлер жыл сайын 60 миңден ашык асыл тукум малды сатып алышы керек. Иш жүзүндө бул көрсөткүч 700дүн тегерегинде.

Жаңылыктар түрмөгү
0