БИШКЕК, 20-июл. — Sputnik. SportsDaily спорттук-жаңылыктар басылмасы кыргызстандык Рафаэль Физиев жеңишке жеткен UFC Fight Island 2 турниринин катышуучулары канча гонорар ала турганын жарыялады.
Басылманын маалыматы боюнча Физиев 77,5 миң доллар тапкан. Ал мыкты беттеш тартуулаганы үчүн негизги гонорарынан тышкары дагы 50 миң доллар бонус алат.
Ал эми беттешке чыкканы үчүн 12 миң доллар берилет, атаандашын жеңгени үчүн дагы ушунча сумма кошулган. Мындан сырткары, дагы 3 000 доллар турнирдин алдында бир жума медиага чыгып, UFC уюмунун иш-чараларына катышканы үчүн алган.
Төрага Жумабеков мушкер Физиевди UFC мелдешиндеги жеңиши менен куттуктады
Кыргызстандык мушкердин каршылашы Марк Диакези 83 миң доллар тапкан. Турнирге катышканы үчүн 28 миң, бонус 50 миң, медиага жумалыкка чыкканы 5 000 долларга бааланган.
Бул турнирде жеңил салмак категориясы боюнча жаңы UFC чемпиону аталган Дейвисон Фигередо эң көп гонорар алган. Анын капчыгына 230 миң доллар түшөрү белгилүү болду.
Эске сала кетсек, кыргызстандык мушкер Рафаэль Физиев 19-июлда Абу-Дабидеги "Мушкерлер аралында" өткөн UFC Fight Island 2 мелдешинде англиялык Марк Диакези менен беттешип, жеңип алган.
