БИШКЕК, 17-июл. — Sputnik. Президент Сооронбай Жээнбеков бүгүн транспорт жана жолдор министри Жанат Бейшенов менен онлайн-кеңешме өткөрдү. Бул туурасында мамлекет башчынын маалымат кызматы билдирди.
Анда өлкөнүн жол тармагынын азыркы абалы жана аны өнүктүрүү иштери талкууланган.
Бейшенов кырдаалга байланыштуу министрликтин бюджети 70 пайызга кыскарганына карабай, мурда бөлүнгөн каражатты үнөмдөө менен ички жолдорду оңдоп-түзөө улантылып жатканын айткан.
Министр Бишкек — Кара-Балта автожолун реконструкциялоо, Маданият — Жалал-Абад жолунун курулушу, Түндүк — Түштүк долбоорун ишке ашыруу боюнча маалымат берген.
"Пандемияга карбай Бишкек — Кара-Балта автожолуна жыл соңуна чейин асфальт төшөп бүткөрүү тууралуу подрядчылар менен келишим түзүлгөн. Ошондой эле каражатты үнөмдөөнүн эсебинен Бишкек шаарынан жети чакырым жол тилкесин оңдоо пландаштырылууда. Маданият — Жалал-Абад жолунда иш толук кандуу уланып, асфальт төшөө иштери жүрүп жатат", — деп маалымат берген министр.
Корумду — Балбай жолун оңдоого Араб өлкөлөрүнөн 116 млн. доллар насыя алынат
Жээнбеков "Кытай — Кыргызстан — Өзбекстан" темир жолун куруу долбоору боюнча бардык тараптар саясий чечим кабыл алганын эске салып, бул багытта үзгүлтүксүз иш алып баруу керектигин белгиледи.
"Бизде деңизге чыгууга жол жок, пандемия шартында ар тараптан "жабылып" калдык. Чек аралар жабылды, экономикага эле эмес, азык-түлүк коопсуздугуна да коркунуч жаралды. Калкты биринчи кезекте азык-түлүк менен камсыз кылуу маселеси коркунучта калды. Андыктан өлкөнүн транзиттик потенциалын жогорулатуу өтө маанилүү, Кытай — Кыргызстан — Өзбекстан темир жолу бизге абадай керек", — деп белгиледи мамлекет башчысы.
Ал эми Бейшеновдун бул долбоорду жүзөгө ашырууга кызыкдар тараптардын министрлери менен эксперттеринин деңгээлиндеги консультативдик жолугушуулар өткөрүлүп жатканын айткан.
