БИШКЕК, 30-июн. — Sputnik. Ош шаарында коронавирус жугузуп алган 71 жаштагы дарыгер Жамал Тазабекова каза болду. Бул туурасында Ош облустук милициянын маалымат кызматы билдирди.
Ал ИИМдин медицина борборунун Ош шаары жана Ош облусу боюнча бейтапканасынын ординатор-врачы болуп эмгектенип келген.
"Жамал Исмаиловна кызматтык милдетин аткарып жүрүп COVID-19 илдетин жугузуп алган. 22-июнь күнү Ош шаардык ооруканасынын жугуштуу оорулар бөлүмүнө жаткырылган. Тилекке каршы, 30-июнь күнү Кыргызстан дагы бир дарыгер кызынан ажырап, оор жоготууга учурады. Ош ОИИБдин өздүк курамы маркумдун жакындарына тереӊ кайгыруу менен көӊүл айтат", — деп жазылат маалыматта.
Жамал Тазабекова 1949-жылы 16-декабрда Ысык-Көл облусуна караштуу Тоң районунун Бөкөнбаев айылында туулган. Эки баланы тарбиялап чоңойткон.
Өлкөдө коронавирустан 7 киши каза болду
1982-жылдан тартып ИИМдин медицина борборунун Ош шаары жана Ош облусу боюнча бейтапканасына жумушка орношкон. Ошондон ушул күнгө чейин ички иштер органдары менен күч түзүмдөрүнүн кызматкерлеринин саламаттыгына кам көрүп келген.
"Кыргыз Республикасынын эмгек сиңирген врачы" ардактуу наамы ыйгарылган.
