БИШКЕК, 24-июн. — Sputnik. Кытайдагы Инженердик илимдер академиясынын академиги, өлкөдөгү алдыңкы эпидемиологдордун бири Чжун Наньшань "Жэньминь жибао" гезитине берген маегинде коронавирус пандемиясы качан бүтүшү мүмкүн экенин божомолдоду.
Анын айтымында, COVID-19 бул жылдын кышы жана эмдиги жылдын жаз мезгилинде дагы жок болуп кетпейт, бирок экинчи, күчтүү толкун башталат деген пикирлер туура эмес.
"Эпидемия алдыдагы кыш жана жазда дагы уланышы мүмкүн. Атүгүл жуктургандардын саны мындан дагы көбөйөт. Бирок дүйнө жүзүн экинчи толкун каптайт деген пикирге кошулбайм", — деди окумуштуу.
Чжун Наньшань вирус ого бетер күч алып кетпеш үчүн сактык чараларын күчөтүп, маал-маалы менен аба каттамдарын токтотуп, окуу жайларды аралыктан окууга өткөрүп туруу керектигин айтат.
Буга чейин Дүйнөлүк саламаттык сактоо уюмунун башчысы Тедрос Адханом Гебрейесус дүйнө коронавирус пандемиясынын өтө кооптуу учурунда тургандыгын билдирген эле.
