БИШКЕК, 17-июн. — Sputnik. Социалдык тармактарда Чүй облусунун Кең-Булуң айылындагы кафенин жанында жашыраак адамдар улгайган кишилерди сабап жаткан видео тарап жатат.
Видеону алгач Facebook баракчасына Назира Ахмедова жарыялаган.
Анын айтымында, окуя 14-июнда болгон.
"Баатыр аттуу киши мас абалында достору менен бир адамды сабайт. Аларга арачага түшөйүн деген 60 жаштагы башка киши дагы токмок жеген. Жабырлануучу милицияга кайрылып, бейбаштыкка баргандар кармалат. Бирок Ысык-Ата райондук сотунун судьясы Н. Р. Тажибаев шектүүлөрдү бошотуп жиберген. Алар оор кылмышка карабастан эч жакка чыкпайбыз деген гана кат жазып беришкен", — деп жазган Ахмедова.
Ахмедова соттордун ишине нааразычылыгын билдирген.
"Биздин соттор ушундай иштешет. Улгайган киши жөн жерден эле токмок жеп калды. Ал ишти мыйзам чегинде чечүүгө аракет кылганы менен майнап чыкпай жатат. Сот эмне себептен мындай башаламандыкты көрүп туруп кылмышкерлерди эркиндикке чыгарды? Муну кантип түшүнсө болот? Эми аягы эмне менен бүтөр экен. Бирок сотторго ишеним болгон эмес жана болбойт", — деп жазган ал.
Анын айтымында, шектүүлөр белгилүү ресторан менен сүт заводдорунун бирине ээлик кылган адамдардын коопсуздугун камсыз кылышат.
Ысык-Ата райондук сотунун кабылдамасы ушул тапта соттук териштирүү жүрүп жаткандыгын айтып, окуяга комментарий берүүдөн баш тартты. Алар соттун макулдугу жок эч нерсе айта албай турганын кошумчалашты.
Чүй облустук сотунун маалымат кызматы шектүү үй камагына чыгарылганын тастыктады.
