Абылгазиев кол алдындагылар менен коштошуп, ийгиликтерин атады

БИШКЕК, 16-июн. — Sputnik. Экс-премьер-министр Мухаммедкалый Абылгазиев өкмөт мүчөлөрүнүн милдетин аткаруучулар менен жолугушуп, өзүнүн кызматтан кетүү саясий чечимин түшүндүрдү.

Өз сөзүндө ал мамлекетке жана элге жоопкерчиликтүү, акыйкат, таза иштөө башкы принциби экенин белгиледи.

"Акыркы мезгилде өкмөттүн, анын ичинде менин атыма фактылар менен тастыкталбаган сөздөр айтылып кетти. Бул мени катуу тынчсыздандырды. Сын-пикирлер өкмөттүн атына дайыма айтылып келген, бирок өкмөттүн кадыр-баркына, аброюна шек келтирген далилсиз сөздөр мени ойлондурду. Мен жыштыктар боюнча иштерге эч кандай тиешем жок! Бирок мамлекеттик кызматтын этикасын сактап, коронавируска байланышкан кризистин маалында аткаруу бийлигинин көңүлү бир жерге топтолушу үчүн ушул чечимге келдим", — деди Абылгазиев.

Ошондой эле экс-премьер өзү башкарып турган учурдагы өкмөттүн жетишкендиктерине токтолду.

"Биз үч жолу өлкөнүн реалдуу бюджетин бекиткен жана аны ашыгы менен аткарган өкмөт болдук, андан тышкары, антикризистик бюджетти бекиттик. Ички дүң продукциянын көлөмү 2018-жылы 3,8 пайыз болсо, 2019-жылы 4,5 пайызга өсүштө болду. Бюджет 2018-жылы 135 миллиард сомго барабар болсо, 2019-жылы 148,4 миллиард сомго жетип, 13 миллиард сомго өскөн. Ал эми 2020-жылы COVID-19 пандемиясына чейин бюджетти 163,7 миллиард сомго дейре жеткирүү болжолдонгон", — деди экс-премьер-министр.

Сөзүнүн аягында ал президент Сооронбай Жээнбековго, өкмөт мүчөлөрүнө жана аймактардагы өкүлдөргө ыраазычылык билдирди.

Эске салсак, 15-июнь күнү Мухаммедкалый Абылгазиев премьерликтен кетүү боюнча арызын жазды.

Ал эми бүгүн парламентте көпчүлүк коалициясы өкмөт башчылыкка мурдагы биринчи вице-премьер Кубатбек Бороновдун талапкерлигин сунуштап, колдоп берди.