БИШКЕК, 12-июн. — Sputnik. Былтыркы жылдын ушул учуруна салыштырмалуу микрокредит алган калктын саны 7,6 пайызга, ал эми берилген микрокредиттердин көлөмү 11,4 пайызга көбөйдү. Бул тууралуу Улуттук статистика комитети билдирди.
Тагыраагы, үстүбүздөгү жылдын биринчи кварталында чакан насыя берүүчү уюмдар тарабынан 6 924,3 миллион сом суммасында кредит берилип, алуучулардын саны 143,9 миң адамды түздү.
Эң көп сумма Ош облусунун (берилген микрокредиттердин жалпы көлөмүнүн 20,4 пайызы), Бишкек шаарынын (17,1 пайыз), Жалал-Абад (14,9 пайыз) жана Чүй облустарынын (14 пайыз) тургундарына берилген.
Ал эми кайсы багыттарга жумшалганына токтолсок, биринчи орунда 35,1 пайыз менен айыл чарбадагы ишмердикти өнүктүрүү турат. Экинчи орунга керектөөчүлүк (26,1 пайыз), үчүнчүгө соода жана коомдук тамак-аш чөйрөсү (11,7 пайыз) чыкты.
