БИШКЕК, 16-май — Sputnik. Өткөн сутканын ичинде Кыргызстанда 38 бейтап коронавирустан айыгып, ооруканадан чыгарылды. Бул тууралуу саламаттык сактоо министринин орун басары Нурболот Үсөнбаев билдирди.
Арасында алты медицина кызматкери да COVID-19ду жеңип чыкканы айтылат. Ал эми өткөн суткада жуктуруп алгандар катталган жок.
Жалпысынан республика боюнча 248 медицина кызматкеринен коронавирус аныкталган, учурда 200 медик айыгып чыкты.
Коронавирустун кесепети
Кыргызстанда коронавируска кабылгандардын саны 1117ге жетип, анын ичинен 783ү айыгып чыкты. Тилекке каршы, 14 бейтап каза болуп калды.
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагына карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
