Кант диабети менен ооругандар көбүрөөк кыймылдап турганы жакшы. Жаш балдарды алсак, алар өздөрү эле бир жерде отура албай кыймылда болушат. Ал эми тамакты ылгап жегенге туура келет. Бирок ата-энелердин чама-чаркы ар кандай. Негизи рациондо балык, эт, жумуртка, сүт болушу керек. Азыр эми карантин маалында диета кармаганга мүмкүнчүлүгү деле болбой калды. Негизинен макарон, нан, чай, шекер сыяктуу азыктар менен чектелип жатышат. Бул тууралуу Нурхан Жумабаева Sputnik Кыргызстан радиосунун эфиринде маек куруп жатып билдирди.
Анын айтымында, кант диабети менен ооруган адамдын жакындары биринчи жардам көрсөтүүнү так билиши керек. Абалы начарлаган учурда дарыгерине чалып эмне кылуу керектигин сураган оң.
"Кант диабетине чалдыккан кишини караган адам эгер бейтаптын абалы начарлап баштаса, дароо кантын өлчөшү зарыл. Кант диабетинен жапа чеккендердин жанында ар дайым глюкометр болушу керек. Бейтаптын канты көтөрүлүп же төмөндөгөнүн аталган аппарат гана аныктайт. Оорулуунун жанында глюкометри болбосо, канты түшкөн кезде эсин жогото элек болсо бир кубик шекер берип, дароо ооруканага жеткирүү керек. Ал эми экинчи тип менен ооруган 30 жаштан өйдө курактагы адамдар көбүнчө диетаны сактабай, кантын ченебей койгон учурлар болот. Бул адамдардын жакындары абалы начарлаган учурда дарыгерине чалып эмне кылуу керектигин сураган оң. Негизи эле жашы 30дан өткөн адамдар көбүнчө кант диабети менен ооруп калганын байкашпайт. Оорунун негизги белгилери: чач түшөт, салмак кошулат, көп заара кылып, суусап, оозу кургайт, ошондой эле бели ооруп, көздүн көрүүсү начарлайт. Бул белгилер болсо сөзсүз түрдө кант диабетине анализ тапшыруу керек. Мындан сырткары, оору аныкталган адамдар денесине күч келтирбей, бирок дайыма кыймылда болуп турушу зарыл ", — деди Жумабаева.
Ал эгер адам оорулууга биринчи жардам көрсөтүүнү билбесе, интернетте жазылган кеңештерди жасабай дароо Тез жардам чакыруу керектигин кошумчалады.
