БИШКЕК, 20-апр. — Sputnik. “Ислам мамлекети” террордук кыймылынын лидери учурда Ирак мамлекетинин аймагында. Бул тууралуу жергиликтүү al-Sumaria телеканалына шилтеме берип РИА Новости жазды.
Маалыматка караганда, аны жүзүнөн уюмдун бир нече жетекчиси гана тааныгандыктан, Ирак жана АКШнын атайын кызматтары аны аныктоо жана кармоо боюнча иш алып барууда.
"Абу Бакра аль-Багдади өлтүрүлгөндөн кийин уюмду Абу Ибрагим аль-Курейши башкара баштаган. Бирок анын чынында ким экени аныктала элек. Британиялык ЖМКлар бул ысым менен ошол эле Иракта туулуп-өскөн Амир Мухаммед Абдул Рахман аль-Мауля ась-Сальби деген адам жүргөнүн жазган”, — деп айтылат макалада.
Ошондой эле акыркы айларда “Ислам мамлекети” ар кайсы жерде бир нече террордук соккуларды жасаганы айтылат. Адистердин айтымында, бул Иракта талкалангандан кийин майда-барат бандиттик топко окшоп калган уюмду жаңы жетекчи кайра чогулта алганынан кабар берет.
Эске салсак, "Ислам мамлекетинин" мурдагы уюмунун башчысы Аль-Багдади былтыр АКШ аскерлери тарабынан Сирияда жок кылынган. Кийин анын ордуна Абу Ибрагим аль-Курейши деген киши келгени айтылган.
