БИШКЕК, 18-апр. — Sputnik. Кыргызстан боюнча учурда 26 671 жаран үй карантининде отурат деп билдиришти Саламаттык сактоо министрлигинен.
Ал эми 33 661 киши үй карантинден чыкты.
Республика боюнча март айынын соңунан тарта мобилдик 255 бригада иштеп, медиктердин көзөмөлүндө турган жарандардын үйүн кыдырып, текшерип келишет.
Бишкек шаарында бүгүнкү күндө 40 бригада иштеп жатат. Свердлов райондук үйбүлөлүк биргелештирилген борбордун директору Жыргалбек Савданбековдун айтымына караганда, марттын соңунан тарта медиктердин көзөмөлүндө 950 киши турганын айтты.
"Мобилдик бригадалар абдан чоң жумуш аткарды. Үйдө отургандарды жөн эле карап, көзөмөлдөп койгон иш болгон жок. Кишилер байланышка чыккысы келбегенде бир топ татаал болот. Медиктер толук жабдуу менен кийинип барганда коңшуларынын кооптонуусун жаратат. Бирок кызматкерлер кол куушуруп отуруп калган жок. Бүгүн бизде байкоодо турган 43 гана жаран калды. Калгандары анализдерин эки ирет тапшыргандан кийин карантинден чыкты", — деген Савданбеков.
Коронавирустун кесепети
Эске салсак, Кыргызстандын төрт шаары жана төрт районуна 30-апрелге чейин өзгөчө абал режими киргизилген. Бул аймактарда кечки саат 9.00дөн эртең мененки 6.00гө чейин коменданттык саат иштейт.
Учурда өлкө аймагында эмне болуп жаткандыгы тууралуу Sputnik Кыргызстандын тексттик трансляциясынан көрсөңүз болот.
Sputnik Кыргызстандын телеграм каналынан өлкөдөгү жана ааламдагы соңку окуялар менен кыска-нуска таанышып туруңуз.
