БИШКЕК, 18-апр. — Sputnik. Саламаттыкты сактоо министрлиги жергиликтүү бийлик менен биргеликте COVID-19 очокторунда иштеген ар бир медицина кызматкерин коргоо кийими менен камсыздоону күчөтүү тапшырмасы берилди. Бул тууралуу Республикалык ыкчам штабдын жыйынында айтылган.
"Медицина кызматкерлери көтөргөн маселелердин жана даттануулардын бардыгы дыкат изилденип, кемчиликтерди жоюу боюнча тапшырмалар берилүүдө", — деп айтылат маалыматта.
Жыйынга өкмөттүн облустардагы ыйгарым укуктуу өкүлдөрүнөн тышкары Саламаттык сактоо министрлигинин жер-жерлердеги санитардык дарыгерлери жана координаторлору катышты.
Анда COVID-19 менен каршы күрөшүүгө тартылган медицина кызматкерлерин жеке коргонуу каражаттары менен камсыздоо маселелери талкууланган.
Өкмөттүн ыйгарым укуктуу өкүлдөрүнүн маалыматында, бүгүнкү күндө жеке коргонуу каражаттарынын зарыл саны бар, Бишкектен медицина буюмдары жана коргонуу каражаттары ташылууда.
"Медицина кызматкерлеринен түшкөн ар бир даттануу териштирилип, кемчиликтерди четтетүү боюнча тапшырмалар берилип жатат. Саламаттык сактоо министрлиги өкмөттүн облустардагы ыйгарым укуктуу өкүлдөрү, райондордун акимдери менен биргеликте иштеши керек. Инфекция чыккан жерлерде иштеген жана коронавируска чалдыккандар менен байланышта болгон ар бир дарыгердин, медицина кызматкеринин коргоо кийимдери менен жетиштүү көлөмдө камсыз болушун көзөмөлдөөнү күчөтүүгө тийиш. Жергиликтүү бийлик органдары илдетти жуктурууга жол бербөө үчүн медицина кызматкерлерин жеке коргонуу каражаттарын колдонуунун санитардык эрежелерине окутуу иштерин көзөмөлгө алсын", — деген Боронов.
Саламаттык сактоо министри Сабиржан Абдикаримов донордук уюмдардан 63 жасалма дем алдыруучу жабдуу алуу боюнча иштер жүрүп жатканын айтты.
"Кыргызстанга 19-апрелде Польшадан, 20-апрелде Кытайдан адистер келишет. Алар окутуу жүргүзүп, дарыгерлерге кеңеш беришет", — деди министр.
Андан сырткары аталган министрликке эки күндүк мөөнөттө март айы үчүн өбөлгөлөөчү төлөмдөрдү төлөөнү аяктоо тапшырылды.
Коронавирустун кесепети
Кыргызстанда коронавируска кабылгандардын саны бүгүн 506га жетти. Арасында 116 медицина кызматкери да вирус жуктуруп алган. Оорунун кесепетинен беш адам каза тапты.
Белгилей кетсек, Sputnik Кыргызстан редакциясы карантин учурунда ар тараптан жардам бере турган кызматтардын ишеним номерлерин жана облустардагы комендатура, штабдардын номерлерин жарыялаган.
Учурда өлкө аймагында эмне болуп жаткандыгы тууралуу Sputnik Кыргызстандын тексттик трансляциясынан көрсөңүз болот.
