БИШКЕК, 18-апр. — Sputnik. АКШ президенти Дональд Трамп америкалык тарап COVID-19 коронавирусу Кытайдын Ухань шаарындагы лабораторияда пайда болгон деп божомолдоп, анын келип чыгышын аныктоого ниеттенүүдө деп билдирди. Бул туурасында РИА Новости жазды.
"Кызыктуу көп нерселер болуп жатат. Иликтөөлөр да жасалууда. Кайдан чыкканын билүүгө ниеттенип жатабыз. Бул жерде кандай формада келди, эмне болду деген маанилүү эмес. Бир билгеним — кайда пайда болбосун, эмне болбосун, баары бир ал Кытайдан чыккан. Мындан 184 өлкө жапа чегип жатат", — деген Трамп брифингде сүйлөп жатып.
Ага вирус Ухандан чыккан деген маалыматтын канчалык деңгээлде чындыгы бар жана аны иликтөө кандай жүрүп жатат деген суроо беришкен.
Буга чейин АКШнын мамлекеттик катчысы Майк Помпео Кытайдан коронавирус пандемиясынын пайда болушу туурасында ачык маалыматтарды талап кылган. Анткен менен бир катар ЖМКлардын вирус Ухандагы лабораториядан жайылып кетиши мүмкүн деп жазган маалыматты тастыктоодон да, четке кагуудан да баш тарткан.
Американын Fox News телеканалы маалымат булактарына таянып, COVID-19 жуктурган биринчи пациент Ухандагы Вирусология институтунун лабораториясында иштеген адам болгон деп жар салган. Каналдын маалымат булактарынын бири Кытайды тарыхтагы "эң кымбат операциянын далилдерин жашырды" деп күнөөлөгөн. Муну менен катар эле лаборатория биологиялык куралды иштеп чыкпаганы, болгону кытайлык окумуштуулардын вирусту изилдеген жыйынтыктарын көрсөткөнү маалымдалган.
Кытайдын Тышкы иштер министрлигинин расмий өкүлү Чжао Лицзянь Twitter баракчасына "Уханга коронавирусту АКШнын аскерлери алып кириши мүмкүн" деген да маалыматты жазган.
Кытай бийлиги 2019-жылдын 31-декабрында Дүйнөлүк саламаттыкты сактоо уюмуна өлкөнүн борбордук бөлүгүндөгү Ухань шаарында (Хубэй провинциясында) өпкө дартына чалдыктырган белгисиз вирустун таралганын билдирген. Адистер аны жаңы коронавирус козгогондугун айтышкан. ДССУ вируска кийинчерээк расмий аталыш берген.
Аталган уюм 2020-жылдын 11-мартында COVID-19 коронавирус инфекциясынын дүйнөлүк пандемиясын жарыялаган. ДССУнун соңку маалыматтарына караганда, ал 2,1 миллион адамга жугуп, 140 миңден ашуун киши көз жумган.
Ал эми Кыргызстандагы абалга токтолсок, вирус жуктурган адам боюнча 18-мартта расмий маалымат чыккан. Андан бери оорулуулардын саны 506га жетип, беш адам көз жумду. Коронавируска чалдыккандардын арасында 116 медицина кызматкери бар.
