БИШКЕК, 29-мар. — Sputnik. Бишкек шаарында 29-мартка караган коменданттык саат учурунда 119 адам кармалды. Бул туурасында комендант Алмазбек Орозалиев билдирди.
Анын айтымында, коменданттык сааттын эрежесин бузуп райондук милицияга жеткирилгендердин 104ү эркек киши, 15и аял. Анын ичинде чет элдик беш жаран бар. Бул фактылар боюнча 67 протокол түзүлгөн.
“Күнү-түнү ички иштер органдарынын жана куралдуу күчтөрдүн өздүк курамынын кызматкерлери сиздердин коопсуздугуңуздар үчүн иштеп жатат. Айтарым, биринчи кезекте коронавирустун жайылышын жеке өзүбүз гана токтото алабыз. Эгер азыр кайдыгер карасак, кесепети ар бирибизге тиет”, — деп кайрылды комендант.
Мындан сырткары, ал түндө борбор калаада 28 кылмыш катталып, анын 21инин бети ачылганын кошумчалады.
Кыргызстанда азыркы тапта 58 адам коронавирус менен күрөшүп жатат.
Бишкек, Ош, Жалал-Абад шаарлары жана Сузак, Кара-Суу, Ноокат райондоруна өзгөчө абал киргизилип, кечки саат 20:00дөн кийин көчөгө чыгууга тыюу салынган. Мындай режим 15-апрелге чейин уланат.
