БИШКЕК, 19-мар. — Sputnik. Кыргызстанда жарандык авиарейстердин бардыгы токтотулуп, үчөө гана иштеп турмай болду. Бул тууралуу өкмөттөн билдиришти.
Мындай чечим коронавирусту алдын алуу боюнча республикалык штабдын кезексиз жыйынында кабыл алынган.
Анда 20-марттан тарта эл аралык каттамдар токтотулары айтылган. Бирок буга жүк ташуулар менен айрым жүргүнчү авиарейстеринин тиешеси жок. Маселен, Москва — Бишкек, Москва — Ош жана Новосибирск — Бишкек каттамдары жумасына бир жолу аткарылып турат.
19-мартта коронавируска байланыштуу "Манас" аба майданы бир катар авиакомпаниялардын рейстерин убактылуу токтотуп жатканын билдирди. Анын ичинде Кыргызстандан Россияга да каттамдар токтотулган. Ага чейин РФ чет элдиктердин кирүүсүнө убактылуу чектөө киргизген болчу.
