БИШКЕК, 17-мар. — Sputnik. Фондулук рыноктогу баалар кескин төмөндөп кеткендиктен дүйнөдөгү эң бай деген 20 адамдын байлыгы 68 миллиард долларга кыскарды. Бул туурасында РИА Новости Forbes маалыматына таянып жазды.
"Анын фонунда S&P 500 индекси 12 пайызга, ал эми Dow Jones 13 пайызга түшүп, бул 1987-жылдан берки болгон абдан көп ылдыйлоо катары катталды. Мунун кесепетинен дүйнөдөгү 20га жакын бай киши 68 миллиардга чукул доллар жоготту", — деп белгилеген журнал.
Forbes Real-Time эсептегичинин маалыматына караганда, алардын ичинен көбүрөөк зыян тарткан ишкер, Facebook негиздөөчүсү Марк Цукерберг болуп, 8,8 миллиард долларынан кол жууганы айтылды. Microsoft компаниясынын мурдагы башчысы Стив Балмер 6,9 миллиард доллар жоготкон. Ал эми Oracle негиздөөчүсү Ларри Эллисондун тарткан зыяны 6 миллиард долларды чапчыган.
Баарынан көп чыгым тарткан Louis Vuitton Moët Hennessy компаниялар тобунун жетекчиси Бернар Арно болгон. 13-февралдан тарта анын байлыгы 29,6 миллиардга кыскарса, ушу тапта 79,9 миллиард долларга азайып кетти.
Өткөн аптанын бейшемби күнүндө америкалык жана европалык биржаларда баалар кескин түшүп кеткенде миллиардерлер 78 миллиард доллар жоготкон.
Ал эми Россия жана Борбор Азия өлкөлөрүндө да кара бейшемби болду. Россияда рублдин куну кетсе, КРдин валюта рыногунда баа кескин кымбаттап, эл кымгуут болду.
