БИШКЕК, 6-мар. — Sputnik. Бишкекте балалуу аялды жулкулдатып түшүрүп салды деген айдоочу Адилет Кеңешов окуянын чоо-жайын айтып, жүргүнчүлөрдөн кечирим сурады. Sputnik Кыргызстан маалымат агенттигинин кабарчысы аны менен баарлашып келген.
Айдоочунун айтымында, окуя 5-мартта кечки саат 5-6лар чамасында Дордой конушунан Ак-Ордо конушун көздөй баратканда болгон. "Дордойдун" аялдамасынан түшкөн эки аялдын биринин колунда бала, экинчисинде коляска бар болчу.
"Колясканын дөңгөлөктөрү алдыда отурган адамдардын бутун булгап, өтүүгө тоскоолдук жаратып, ошондон жүргүнчүлөр бири-бири менен уруша башташты", — дейт айдоочу.
Кеңешовдун айтымында, маршрутканын ичиндеги уруштан улам он мүнөттөй жолдо туруп, убактысынан кечигип калган.
"Интернеттеги видео окуянын аягында тартылып калыптыр. Жүргүнчүлөрдүн уруш-талашы он мүнөттөн ашык болгон. Ушундан улам жолдо туруп, убактымдан кечигип калдым. Мен алгач алардын урушуна аралашпай эле отургам. Маршрутканы айдап кетейин десем эшикти жабышпайт же түшүп калышпайт. Бирок ал аялды жулкулдатып түшүргөн жокмун жана "акча төлө" деп айткан эмесмин. Бирок тыгын пайда болуп, он мүнөт кечигип калган үчүн ачууланганым чын. Ыңгайсыздык жаратып алсам жүргүнчүлөрдөн кечирим сурайм", — деп айтты ал.
Учурда бул иш боюнча "ТрансГруппКоммуникейшн" фирмасынын жетекчилери менен териштирүү иштери жүрүп жатат.
Аталган фирманын жетекчилиги айдоочуну 10 күнгө убактылуу иштен четтеткен.
Ал эми Автотранспорт агенттигинин Бишкек шаардык башкармалыгы тарабынан фирмага эскертүү берилди.
Эске салсак, кечээ, 5-мартта, күбө маршруткага коляскасы менен кирген балалуу аялды айдоочу "көп орунду ээлеп жатасың" деп транспорттон жулкулдатып түшүрүп салганын айтып, видеосун жиберген. Анын айтымында, аныгында коляска эч кимге жолтоо болгон эмес, себеби бүктөлүп бурчта турган. Аял өзү дагы орундукта отурбай, туруп турган.
