Сыдыков: жарандар курулуш компаниялары менен компромисcке барса болот
Шаар бийлигинин жарандардын жеке менчик турак жайын тартып алуусуна мыйзам жол бербейт. Бул тууралуу Урматбек Сыдыков Sputnik Кыргызстан радиосуна маек куруп жатып билдирди.
Анын айтымында, коомчулуктун бул боюнча дүрбөлөңгө түшүүсүнө маалыматтын жетишсиздиги себеп болууда.
"Конституцияда мамлекеттик, муниципалдык жана жеке менчик деген бар. Булардын ар бири мамлекет тарабынан корголот. Ошондуктан жеке менчикте турган турак жайды эч ким тартып ала албайт. Эски үйлөрдү түрттүрүп, турак жайларын тартып алат деген маалыматтар бизге да жетип жатат. Бул мыйзамды билбестиктен улам жаралууда. Мындан улам жарандарды кооптоно турган жагдай жок деп ишендирип кетмекчимин. Эски үйлөрдү бузуп, жаңы үйлөрдү курууга мамлекеттин каражаты жетишпейт. Аны курулуш компаниялары ишке ашырат. Демек жарандар алар менен сүйлөшүп, келишим түзүп, компромисc менен иш алып барса болот. Болгону келишим түзүүдө бардык жагдайына көңүл буруу зарыл. Анткени келишимди ар ким өзүнө ыңгайлуу кылып түзгөнгө аракет кылат", — деди Сыдыков.
Адвокат көп кабаттуу үйлөрдүн жер аянттары дагы турак жай ээлеринин шериктиги же ушул сыяктуу бирикмелердин менчиги болуп саналарын кошумчалады.
