БИШКЕК, 18-фев. — Sputnik. Шаршемби күнү, 19-февралда, күндүз Ысык-Көл облусунун кээ бир райондорунда кар жаайт. Чүй, Талас, Ош, Жалал-Абад, Баткен облустарынын айрым райондорунда туман түшүшү ыктымал. Бул тууралуу Кыргызгидромет билдирди.
Жолдор тайгак жана тоңголок болуп, тоолуу аймактарда кар күрткүсү пайда болот. Батыштан соккон шамалдын ылдамдыгы секундасына 2-7 метрден Ысык-Көл акваториясында 15-20 метрге жетет.
Абанын температурасы Чүй, Талас аймагында -1…+4, Ысык-Көл жергесинде 0…+5, Ош, Жалал-Абад, Баткен облустарында +3…+8 градус жылуу, ал эми Нарында -1…-6 градус суук болот.
Ош жана Бишкек шаарларында жаан-чачын жаабайт. Күндүн табы борборубузда +2…+4 жана Ошто +3…+5 градуска чейин көтөрүлөт.
