Акыркы 2-3 жылдан бери алыш күрөшүнө кызыккан кыз-келиндердин саны аябай өстү. Бүгүнкү күндө өлкө ичиндеги мелдештерди жеңип чыгуу кыйла оор болуп, атаандаштык өтө курч. Бул тууралуу Мээрим Момунова Sputnik Кыргызстан радиосуна маек куруп жатып билдирди.
Анын айтымында, алыш күрөшүн олипиадалык спорт түрлөрүнүн катарына кошуу аракеттерин көрүү керек. Анткени бул спорттун түрүнө дүйнө жүзү боюнча кызыккандар көп. Спортчу эгер алыш күрөшү олимпиадалык дисциплина болуп табылса, кыргыз балбандары көптөгөн ийгиликтерди жаратышмак деп эсептейт.
"Алыш күрөшүнө чейин мен дзюдо менен машыкчумун. Бул спорттун түрүнө капысынан эле келип калгам. Өзүмдү сынап көрөйүн деп бир мелдешке катыштым. Анткени алыш менен дзюдонун окшош жактары көп. Жыйынтыгында мелдешти уттум, бул күрөштүн түрү дароо жагып калды. Ошондон бери алыш боюнча улуттук курама командага кошулуп, өлкө атынан эл аралык жана дүйнөлүк мелдештерге катышып келем. Мен бул спорттун түрү менен жаңыдан алектенип баштаганда алышка кызыккан кыз-келиндер абдан аз болчу. Акыркы 2-3 жылдын аралыгында бул күрөш менен машыккан кыздардын саны кескин өстү. Буга чейин Бишкек, Ош, Жалал-Абаддан гана кыздар таймаштарга катышып келсе, бүгүнкү күндө Ысык-Көл, Нарын облустарынан да күчтүү кыздар келе баштады. Бул алыштын өнүгүп жатканынан кабар берет. Кыздардын басымдуу бөлүгү улуттук курама команданын катарына кошулуп, чет өлкөлөргө чыккылары келет экен. Бул дагы өзүнчө стимул жана мыкты балбандарды иргеп алууга чоң мүмкүнчүлүк. Негизи эле алыш күрөшүн өнүктүрүп, кийин бара-бара олимпиадалык спорт түрлөрүнүн катарына кошуу башкы максат болушу зарыл. Ага мамлекеттин да колдоосу керек", — деди Момунова.
Чемпион олимпиадалык эмес спорт түрлөрүнүн арасынан алышка мамлекет тарабынан өзгөчө маани берилерин жана демөөрчүлөр да жакшы колдоо көрсөтөрүн айтып, дүйнө биринчилигин багындырган балбандар ай сайын 25 миң сом стипендия аларын кошумчалады.
