Сыдыкназарова: кесиптик ийримдерде каалаган мугалим сабак бере бербейт
Бүтүрүүчү класстын окуучулары келечекте ким болоруна жараша ошол багыттагы сабактарды тереңдетилген шартта окууга мүмкүнчүлүк түзүлдү. Бул долбоордо сабак берүү үчүн атайын 58 мугалим билимин жогорулатып, тиешелүү окутуулардан өтүштү. Бул тууралуу Кылым Сыдыкназарова Sputnik Кыргызстан радиосунун таңкы эфиринде маек куруп жатып билдирди.
Анын айтымында, аталган долбоордун алкагында мугалимдердин айлык акысына деп өзүнчө каражат бөлүнгөн эмес.
"10-11-класстын окуучулары келечекте тандаган кесибине көмөк берүүчү атайын ийримдерге катышышат. Эгер бала мектепти бүткөн соң дарыгер болом десе, демек, химия, биология сабактарын окуйт. Мындай ийрим жумасына бир ирет өткөрүлүп турат. Бул долбоордо каалаган эле мугалим келип сабак бере албайт же сааты аз болуп калган педагогго жүктөлбөйт. Шыгы, мүмкүнчүлүгү бар мугалимдер атайын даярдыктан өтүп, билимин жогорулатуучу курстардан окушкан. Колунда мына ушундай сертификаты бар мугалимдер гана бул ийримдерде сабак берет. Катардагы мектептерге эмес, гимназияларга киргизилгенинин да башкы себеби ушул болду. Анткени ийримдерден окуткан эже-агайлардын маянасына бюджеттен кошумча каражат каралган жок", — деди Сыдыкназарова.
Ал ошондой эле атайын окуудан өтүп келген мугалимдер жакын жайгашкан башка мектептин педагогдоруна өз тажрыйбалары менен бөлүшүп туруусу үчүн түрдүү семинарлар уюштурулуп жатканын кошумчалады.
