БИШКЕК, 6-янв. — Sputnik. 2018-жылы калкка социалдык-психологиялык жардам көрсөтүүчү кризистик борборлорго жана башка адистештирилген мекемелерге үй-бүлөлүк зомбулуктан жабыркаган 8 730 адам кайрылган. Бул тууралуу Улуттук статистика комитети билдирди.
Маалыматта жардам сурап кайрылгандардын 78 пайызы аялдар экени айтылат.
Ал эми Ички иштер министрлигинин маалыматы боюнча, беш жыл аралыгында үй-бүлөлүк зомбулук фактылары боюнча берилген убактылуу коргоо ордерлеринин саны 3,5 эсе өскөн. Алсак 2014-жылы 2619 адам кайрылса, 2018-жылы 7178 адам үй-бүлөлүк зомбулуктан коргоого алынган.
Мындан сырткары, беш жылдын ичинде кылмыш ишин кароо жана сотко жиберүү боюнча фактылар 1,5 эсеге өскөн.
