БИШКЕК, 10-дек — Sputnik. Президент Сооронбай Жээнбеков бүгүн, 10-декабрда, Адам укуктарынын эл аралык күнүнө карата кайрылуу жолдоду. Бул тууралуу өлкө башчынын маалымат кызматынан билдиришти.
Мамлекет башчы Кыргызстан 1994-жылы алгачкылардан болуп Бириккен Улуттар Уюмунун Адам укуктарынын жалпы декларациясына кошулганын айткан.
"Адам укуктарын коргоого жана демократиялык принциптерди бекемдөөгө багытталган БУУнун идеялары биздин коомдун менталитетине шайкеш келет. Улутуна, тилине, диний ишенимине карабастан ар бир инсандын кадыр-баркын урматтоо, адам укугун сактоо, коомдогу ынтымакты чыңдоо — ата-бабаларыбыздын кылымдарды карыткан көөнөрбөс мурасына кирет. Ошондуктан адам укуктарын коргоо — биздин мамлекетибиздин негизги милдети бойдон кала берет. Биз ар бир жарандын укуктары кынтыксыз сакталган мамлекетти, адамдар өз укуктарынын сакталарына бекем ишенген коомду курууга умтулабыз", — деген Жээнбеков.
Маалыматта Кыргызстан БУУнун алкагындагы адам укуктарына тиешелүү эл аралык келишимдердин дээрлик баарын ратификациялаганы айтылат. Быйыл Баланын укуктары жөнүндө конвенциянын 30 жылдыгы белгиленген.
"Бирок биз дагы көп нерсени жасоого тийишпиз. Эң башкысы, адам укуктарын бекем сактаган ынтымактуу коомду жана адилеттүү бийликти түзүү — биздин максат. Бул иштин ийгилиги — өлкөбүздө мыйзамдардын кыйшаюусуз аткарылышына жараша болот. Ошондуктан бул иштин ийгилиги ар бирибизден көз каранды", — деген Жээнбеков.
Мамлекет башчы мекендештерге бекем ден соолук, ынтымак, тынчтык каалаган.
Биздин Telegram-каналга жазылыңыз.
