Бишкекте эки акын кыздын поэзия кечеси өтөт

БИШКЕК, 7-дек. — Sputnik. Борбор калаада акындар Жыпар Акунова менен Клара Кичинемолдоеванын чыгармачылыгына арналган "Каректеги жаз" деп аталган ыр кече өтөт. Бул тууралуу "Роза Отунбаеванын демилгеси" эл аралык фондунан кабарлашты.

Иш-чара 17-декабрда Кыргыз улуттук филармонияда өтөт.

Жазуучулар союзунун мүчөсү акын Жыпар Акунова "Шок жылдыз" (1985), "Дилчырак" (1994), "Каректе калган жаз" (2009), "Жүрөгүңө барчу жолду издепмин" (2012), "Түштүккө түшкөн келин" (2015) , "Мөлтүрөк" ырлар жана прозалык чыгармалар жыйнактарынын автору.

Кыргыз мамлекеттик университетин бүтүргөндөн кийин "Ленинчил жаш" гезитинде кабарчы, "Мектеп" басмасында редактор, Ош облустук "Ленин жолу" гезитинде кабарчы болуп эмгектенген. 1997-жылдан бери республикалык, өкмөттүк "Кыргыз Туусу" гезитинин Ош облусу боюнча кабарчысы болуп эмгектенип, 2017-жылдан бери башкы редактордун Кыргызстандын Түштүк аймагы боюнча орун басары.

Акын Клара Кичинемолдоева "Аруу дүйнө" ырлар жыйнагынын автору. Учурда Абылай Сатылганов атындагы орто мектебинин директору.

1981-1984-жылдары Жети-Өгүз районундагы Дархан орто мектебинде кыргыз тили, адабияты мугалими болуп иштеген.

Кечеде обондуу ырлар аткарылып, акындар ырларын көрүүчүлөргө окуп берет.