Ниязов: куудул деген сөздү түшүнө албай баш катырдым
1969-жылы Улуттук филармонияга ишке киргенден тартып куудул деген сөздүн келип чыккан тарыхына кызыктым. Ошол жерде иштеген аксакал артисттерден сурасам, алар эки сөздөн келип чыкканын айтышты. Бул тууралуу Келдибек Ниязов Sputnik Кыргызстан радиосунун эфиринде маек куруп жатып билдирди.
Анын айтымында, куудул жөн гана элди күлдүрө алган адам эмес, тапкыч, билимдүү, сөзмөр да болушу керек.
"Төкмө төгөт, манасчы "Манас" айтат, комузчу комуз чертет, эмнеге биздин кесип куудул деп аталат деп жаш кезимде көп ойлончумун. Аксакалдардан сурасам алар да так жооп бере албай, билген адамдардан сурашыптыр. Көрсө, куудул деген аталыш "куу", анан "дулдул" деген эки сөздөн келип чыккан тура. Куу — айлакер, тапкыч дегенди түшүндүрсө, чечендин бир аты дулдул да. Айтууга ылайыкташып кийин куудул болуп кетиптир", — деди Ниязов.
Ал куудулдук өнөрдүн максаты жөн гана элди күлдүрүү эмес, коомдогу тигил же бул көйгөйдү күлкү аркылуу ачып берүү экендигин кошумчалады.
