БИШКЕК, 19-окт. — Sputnik. Бишкекте мугалимдердин, педагогика багытындагы илимпоздордун, эксперттердин жана эл аралык долбоорлордун кеңешчилеринин катышуусу менен "Кыргызстанда билим берүүнү 2020-2030-жылдарга карата өнүктүрүүнүн концепциясы" талкууланды.
Аталган концепция көз карандысыз эксперттер тарабынан дээрлик эки жыл ичинде кыргыз тилинде даярдалган. Аны жазууда билим берүүдөгү улуттук жана дүйнөлүк тенденцияларды эске алуу менен улуттук баалуулуктарга басым жасалган. Андан сырткары, билим берүүдө жаңыча ой жүгүртүү каралган.
Борбор Азия регионалдык институтунун төрагасы, тарых илимдеринин доктору Алмазбек Бейшеналиев билим берүүнү 2030-жылга карата өнүктүрүүнүн бул концепциясы КР "Билим берүү жөнүндө" мыйзамда белгиленген негизги идеяларды улантууну көздөй турганын белгиледи.
"2018-2040-жылдарга карата түзүлгөн Өнүктүрүүнүн улуттук стратегиясында "билим берүү системасы ар бир адамдын дараметин ачкан ар тараптуу инсанды тарбиялоого, иш жүзүндө колдонулуучу билимди жана көндүмдөрдү берүүгө багытталат" деп баса белгиленген. Ушуга ылайык ар бир жаран үчүн сапаттуу билим алууга мүмкүнчүлүк түзүлүшү керек", — деди ал.
Бейшеналиев коомдогу өзгөрүүлөр эмгек рыногуна да таасир берип жатканын айтып, окуучулардын 60 пайызы жаңы пайда боло турган кесиптерге даяр болушу керектигин кошумчалады. Ал келечекте робототехника, биотехнология, IT-технология, нанотехнологияга суроо талап күч болорун билдирди.
Аталган концепция адистердин, эксперттердин сунуштарын эске алуу менен Билим берүү министрлигине сунушталат.
